OÉ-CUSSE, 07 outubru 2022 (TATOLI) – Profesór kontratadu hamutuk na’in-182 iha Rejiaun Administrativa Espesiál Oé-Cusse Ambeno (RAEOA), sesta ne’e ofisialmente simu ona graduasaun hosi Univesidade Timor Lorosa’e ho títulu baxarelatu iha nivél edukasaun, Fakuldade Edukasaun Arte Humanidade (FEAH).
Profesór na’in-182 ne’e komposta hosi mane 85 no feto 97 mai hosi ensinu pré-eskolár, ensinu báziku to’o sekundáriu, hafoin hala’o kursu espesializada iha formasaun espesializada ba profesór durante tinan tolu, liuhosi kooperasaun UNTL ho Institutu Nasionál Formasaun Dosente no Profisionál Edukasaun (INFORDEPE), tanba tuir lei baze ba edukasaun azije ema atu sai profesór mínimu grau akadémiku tenke baxarelatu no másimu lisensiatura.
Iha diskursu, Retór UNTL, João Soares Martins, informa, formasaun ba profesór ba grau baxarelatu iha territóriu nasionál hamutuk 2,567 espesiál iha Oé-Cusse 182, tán ne’e graduasaun ne’e hanesan dala ikus ona iha Oé-Cusse.
“Ohin primeira vez graduasaun maka UNTL hala’o iha RAEOA, dezde kriasaun RAEOA hamriik, entaun orgullu boot grasa wain boot ba Oé-Cusse tanba nia oan 182 hetan graduasaun ba grau baxarelatu ba profesór sira, ha’u fó parabéns ba imi hotu,” João Soares Martins, ko’alia iha ámbitu serimónia graduasaun realiza iha otél Ambeno, Oé-Cusse.
Nia apela ba graduante sira, mezmu hetan ona graduasaun hanesan etapa ida atu kompleta ona karreira nu’udar profesór, maibé tenke kontinua estuda nafatin atualiza-aan atu partisipa tán iha kursu formál ka naun-formál, nune’e bele estuda rasik atu atualiza tuir progresu avansu siénsia téknolojia nian.
Prezidente Autoridade RAEOA Arsénio Paixão Bano, orgullu tanba entre graduante sira na’in-182 maioria feto, tanba Oé-Cusse aumenta tán kualifasaun ba profesór sira iha nível edukasaun atu hasa’e tán kualidade edukasaun hahú hosi nível kraik.
“Ha’u agradesu entidade hotu tanba servisu hamutuk konsege realiza formasaun ne’e to’o ohin loron bele hetan sira-nia rekoñesimentu ho títulu baxarelatu ba edukasaun nian, ami agradese hanoin UNTL nia duni mak bele fó solusaun, tanba liuhosi edukasaun formál MESSK koopera di’ak ho INFORDEPE konsege hetan duni nia rezultadu to’o ohin loron profesór 182 hetan ona sira-nia títlu ho grau baxarelatu” nia agradese.
Notísia relevante: UNTL-INFORDEPE realiza yudisium ba profesór baxarelatu 182 iha RAEOA
Jornalista: Abílio Elo Nini
Editór: Evaristo Soares Martins
