VIQUEQUE, 07 outubru 2022 (TATOLI)–Diretór Programa Nasionál Dezenvolvimentu Suku (PNDS) munisípiu Viqueque, Higino Posinato Zamor e Silva, hateten, ekipa sei implementa projetu dada bee-moos hamutuk 21 ba populasaun.
“Programa PNDS munisípiu Viqueque tinan ne’e iha projetu dada bee-moos hamutuk 21, ne’ebé identifika hotu ona no hein atu implementa iha postu Ossu, Uatulari no Lacluta,” Diretór informa iha ninia knaar fatin, Beloi, sesta ne’e.
Antes ne’e, ekipa halo ona peskiza no Bill of Quantity (BoQ), ne’ebé daudaun hein halo espesifikasaun verba nian.
“Ami hasoru difikuldade hanesan presu materiál sae. Ami halo ona BoQ no entrega ba nasionál depois presu materiál sa’e. Entaun, difuldade ba ita mak sosa materiál, maibé projetu sei implementa iha novembru tinan ida-ne’e,” nia akresenta.
Notísia relevante: Uma-kain 1.000 resin iha suku Betano seidauk asesu bee-moos
Aleinde ne’e, kestaun klima mós sai problema tanba daudaun iha situasaun udan, nune’e difísil bainhira lori materiál todan ba fatin konstrusaun.
PNDS mós halo identifikasaun bee-moos ne’ebé antes ne’e komunidade uza maibé maran, nune’e difikulta komunidade tenke kuru bee-moos ho distánsia dook.
“Entaun preokupasaun bee-moos ne’e mai hosi aldeia to’o suku. Suku deside no PNDS ba halo verifikasaun mak foin implementa,” nia tenik.
Tipu projetu dada bee-moos 21 ne’ebé sei implementa hanesan sistema bomba no sistema gravitasaun.
Jornalista : Vitorino Lopes da Costa
Editora : Julia Chatarina
