SERVE Bobonaro rekolla reseita rihun $5-resin
BOBONARO, 07 outubru 2022 (TATOLI) – Servisu Rejistu no Verifikasaun Emprezariál, Institutu Públiku (SERVE, I.P) sukursál munisípiu Bobonaro, rekolla reseita $5,405.00 ba kofre estadu durante fulan-sia, hahú hosi janeiru to’o setembru tinan 2022.
Koordenadór SERVE,I.P sukursál munisípiu Bobonaro, Leopoldo Perreira Fernandes, esplika, reseita hirak-ne’e rekolla hosi empreza no negosiante sira-ne’ebé halo renovasaun sertidaun rejistu komersiál, sertifikadu ba rejistu komersiál no autorizasaun ezersísiu ba atividade ekonómika.
Notísia relevante: Programa rejistrasaun movél, SERVE alista empreza 52 iha Bobonaro
Nune’e rekolla mós hosi alterasaun ba negósiu ho tipu Enin no estatutu ba sosiedade komerisiál mak hanesan alterasaun objetu, aumenta atividade, alterasaun sede, administradór, órgaun sosiál no kapitál sosiál.
“Iha trimestre primeiru ita konsege rekola $1,450.15,segundu trimestre $1,739.00, terseiru trimestre ita rekolla $2,216.00,” nia informa ba Jornalista sira iha knar-fatin, sesta ne’e.
Durante ne’e, SERVE sempre halo atendimentu iha oras serbisu, maibé nafatin hasoru difikuldade tanba kliente balun bainhira sira-nia dokumentu liu ona prazu ka mate ona, maibé husik hela deit no to’o ona tempu Autoridade Inspesaun no Fiskalizasaun Atividade Ekonómika no Alimentár, Institutu Públiku (AIFAESA, I.P) halo ona Inspesaun mak foin halo renovasaun.
“Sira mai ami sempre dehan ba sira, kuandu la halo renovasaun ne’e risku boot sira kuandu iha inspesaun ruma mak hetan imi-nia dokumentu mate, komete tán infrasaun ruma ita-boot sira sei selu kona multa ba saida mak imi komete,” Leopoldo haktuir.
Nia husu ba emprezáriu sira-ne’ebé atu hahú negósiu kiik no ba sira-ne’ebé seidauk rejistu atu mai halo rejistrasaun tanba SERVE,I.P sai liman-ain Ministériu Koordenadór ba Asuntu Ekonómiku (MKAE), Institutu Apoia Dezenvolvimentu Emprezariál (IADE) no Banku Nasionál Komérsiu Timor-Leste (BNCTL) fasilita emprezáriu no negosiante kiik-sira asesu kréditu.
Notísia relevante: SERVE Bobonaro rekolla reseita rihun $2-resin
Jornalista : Sérgio da Cruz
Editór : Evaristo Soares Martins
