DILI, 08 outubru 2022 (TATOLI)—Ekipa Servisu Emerjénsia Médika munisípiu Dili fó ona asisténsia médika ba atleta hamutuk 22 iha eventu Dili internasionál maratona 2022, ne’ebé realiza iha sábadu ne’e.
“Ita-nia atividade ne’e, antes prepara ona iha loron-lima liubá, liu-liu iha parte primeiru sukoru, maibé haree filafali ba ohin, ita halo asisténsia médika ba pasiente hamutuk 22, ne’ebé hosi sira ne’e iha ida mak grave,” Xefe Departamentu Servisu Emerjénsia Médika munisípiu Dili, Simplício Amaral de Deus, informa iha Palásiu Prezidensiál, Bairru-Pité.
Pasiente ida ho kondisaun grave hosi nasaun Quénia, ne’ebé ekipa saúde sira halo observasaun kuaze oras ida, maibé kondisaun saúde ladiak nafatin, nune’e deside lori kedas bá Hospital Nasional Guido Valadares (HNGV).
”Nia grave tanba halai maka’as liu, falta oxijéniu, glukose, no kosar sai hosi nia isin barak, halo dada-iis susar, entaun ho situasaun sira hanesan ne’e mak bele akontese ataka fuan,” nia akresenta.
Notísia relevante: PR husu partisipante Dili internasionál maratona halo ezersísiu di’ak
Pasiente sira ho kategoria kondisaun kama’an, médiu no grave, ne’ebé ho kondisaun kama’an bele halo intervensaun iha fatin hanesan tau soru no fó oxijéniu tanba iha ekipa hosi Servisu Nasionál Ambulánsia Médika hamutuk ho ekipa hosi Dili Medical Center (DMC) hodi fó apoiu ambulánsia hodi fasilita halo tranaférensia pasiente grave ba HNGV.
“Atividade sira hanesan ne’e presiza preparasaun maka’as, liu-liu iha parte primeiru sokoru. Ida-ne’e ita tenke serbisu hamutuk ho Departamentu Emerjénsia HNGV atu bainhira ami halo transferénsia, sira bele fó atendimentu di’ak,” nia tenik.
Pasiente ne’ebé hetan asisténsia médika mai hosi Quénia na’in-lima, Indonézia na’in-haat no restu timor-oan.
Jornalista : Felicidade Ximenes
Editora : Julia Chatarina
