DILI, 08 outubru 2022 (TATOLI)—Prezidénsia Repúblika ho koordenasaun Federasaun Atletizmu Timor-Leste (FATL), sábadu ne’e, realiza eventu Dili internasionál maratona, ne’ebé partisipa hosi ema 1.000 resin.
“Dili internasionál maratona ida-ne’e di’ak tebes. Ita hotu ne’ebé hola parte tenke halo ezersísiu di’ak hodi hatudu ba Timór nia dame,” Prezidente Repúblika (PR), José Ramos Horta, hateten bainhira halo abertura eventu iha Palásiu Prezidensiál, Bairru-Pité.
Aleinde ne’e, PR husu partisipante sira labele tauk halai tanba iha profisionál saúde sira ne’ebé sei hariik iha dalan hodi fó atensaun bainhira akontese buat ruma.
“Ita-nia médiku sira hamriik iha dalan, bainhira ita iha buat ruma, sira sei fó asisténsia ba ita,” nia akresenta.
Notísia relevante: Dili internasionál maratona sei realiza semana oin
Atividade ne’e hahú iha tuku 06:00 dadeer to’o ramata no durante atividade dalan balun sei taka.
Rute ba atividade halai hahú hosi estrada públiku dirasaun Bairru-Pité, Fatuhada, Rotunda Prezidente Nicolau Lobato, Praia dos Coqueiros, Marconi, Palapaço, kruzamentu Mandarin, Farol, Colmera, Largo Lecidere, Ponte BJ Habibie, Bidau Santana, to’o Areia Branca Metiaut. Filafali mai iha Lecidere, Palásiu Governu, Colmera, Mandarin, Palapaço, no sei loke hikas dalan bainhira remata.
Atividade ne’e partisipa mós hosi Primeiru-Ministru, Taur Matan Ruak, Sekretáriu Estadu Juventude no Desportu, Abrão Nokosiku Saldanha, Komadante Operasaun Nasionál inklui partisipante sira hosi entidade oin-oin hosi nasaun Indonézia, Quénia, Singapura, inklui Timor Leste.
Iha eventu ne’e, atleta selesaun nasionál ne’ebé hamutuk na’in-12, komposta hosi feto neen no mane neen kompete iha full maratona no distánsia kilómetru 21, kompete hamutuk ho atleta internasionál sira.
Enkuantu, iha kilómetru 10 ba ema internasionál sira ne’ebé hakarak kompete sei fó mós oportunidade no kilómetru tolu ba atleta juniór sira-ne’ebé hakarak partisipa bele partisipa.
Jornalista : Felicidade Ximenes
Editora : Julia Chatarina
