DILI, 29 setembru 2022 (TATOLI) – Prezidente Federasaun Atletizmu Timor – Leste (FATL) Afranio Xavier Amaral, informa, eventu Dili internasionál maratona sei halao iha loron 08 fulan-outubru, semana oin.
“Dili internasionál maratona ita sei halao 08 outubru iha Dili, ne’ebé ita preparadu atu realiza eventu internasionál ne’e,” Afranio informa ba Agência TATOLI iha Sentru Kulturál Indonézia nian, kinta ne’e.
Nia dehan, preparasaun tékniku daudaun ne’e atinje ona 90% no buat hotu la’o di’ak tebes.
Tuir tarjetu ne’ebé iha, sei simu ema-ne’ebé atu kompete iha eventu ne’e hamutuk na’in-1000 kompostu timoroan no estranjeiru.
“Agora ema-ne’ebé rejistu atu partisipa iha eventu ne’e liu ona 1000 maibé ita-nia tarjetu ne’e 1000 de’it. rejistrasaun ne’e ita loke ba nasaun hotu iha mundu bele rejistu liuhosi online nune’e bele partisipa, nasaun ne’ebé konfirmadu ona mak Angola, Kenya, Indonézia no seluk tan,” nia dehan.
Rejistrasaun daudaun ne’e sei loke nafatin ba públiku liuhosi online maski ema liu ona 1000 tanba sei iha alternativu hodi aumenta númeru atleta.
Iha eventu ne’e atleta selesaun nasionál sei tún hamutuk na’in-12 komposta hosi feto neen, mane neen sei kompete iha full maratona no extra kilómetru 21, kompete hamutuk ho atleta internasionál sira.
Enkuantu iha kilómetru 10 ba ema internasionál sira-ne’ebé hakarak kompete sei fó mós oportunidade no kilómetru tolu ba atleta juniór sira-ne’ebé hakarak partisipa bele partisipa. Rute ba atividade ne’e sei halai haleu de’it iha kapitál Dili.
Atividade Dili internasionál maratona ne’e hanesan atividade ne’ebé inísia hosi Prezidente Repúblika José Ramos Horta no tau ona iha ajenda hanesan atividade anuál durante nia mandatu.
Tanba ne’e atividade refere, organiza hosi Palásiu Prezidensiál no koordena tékniku hosi FATL.
Jornalista: Hortencio Sanchez
Editór: Evaristo Soares Martins
