ANAAA prevee $442.099 ba programa prioridade rua iha OJE 2023
DILI, 10 outubru 2022 (TATOLI)–Ajénsia Nasionál Avaliasaun Akreditasaun Akadémiku (ANAAA) realiza ona audiénsia públika ho Komisaun G ne’ebé trata asuntu edukasaun, kultura, juventude, desportu no sidadania, hodi aprezenta alokasaun orsamentu instituisaun ho montante $442.099 ba programa prioridade rua iha tinan 2023.
Diretór Ezekutivu ANAAA, Edmundo Viegas, hateten, programa prioridade rua ne’ebé sei ezekuta iha tinan oin maka hanesan boa governasaun no jestaun institusionál inklui programa edukasaun no formasaun.
“Ami-nia programa prioridade ba tinan 2023 mantein nafatin ho saida maka ami halo ona iha tinan ida-ne’e no tinan hirak liubá kotuk, liu-liu iha ámbitu avaliasaun no akreditasaun ba programa estudu,” Diretór relata iha resintu Parlamentu Nasionál, segunda ne’e.
Notísia relevante: ANAAA halo avaliasaun atu hadi’a kursu no instituisaun sira
Aleinde ne’e ANAAA sei realiza avaliasaun Institusionál iha tinan oin ba instituisaun rua hanesan Institutu Boaventura Timor-Leste (IBTL) no Universidade Katólika Timorense (UCT, sigla portugés) São João Paulo II, enkuantu ba instituisaun seluk sei halo avaliasaun de’it ba kursu 30.
Ajénsia ne’e ninia orsamentu tinan 2023 ne’ebé aprezenta ona ba Komisaun G iha diferensa 20% kompara ho orsamentu 2022, ho montante $368.000.
“Orsamentu ANAAA ba tinan oin ne’ebé aumenta oituan ne’e sei prepara hodi halo atividade baibain ne’ebé halo ona kada tinan hanesan avaliasaun no akreditasaun. Orsamentu ne’e ami sei halo estudu balun kona-ba empregabilidade graduadu atubele buka tuir filafali graduadu hosi universidade sira atu hatene paradeiru, durante ne’e halo serbisu saida no serbisu ne’ebé sira halo ne’e tuir duni área formasaun ka lae,” nia akresenta.
Iha fatin ketak, Prezidente Komisaun G Parlamentu Nasionál, Deputadu António Verdial, apresia ho rezultadu serbisu instituisaun liuhosi progresu ezekusaun orsamentu 2022.
“Ami apresia ita-boot sira-nia serbisu hodi ezekuta orsamentu bazeia ba programa prioridade. Ita-boot sira iha duni kapasidade atu ezekuta no realiza programa sira ne’ebé maka prevee ona iha planu sira. Ami dezeju ita-boot sira-nia susesu iha tinan ida-ne’e,” nia tenik.
Jornalista : Tomé Amado
Editora : Julia Chatarina
