DILI, 10 outubru 2022 (TATOLI)-Governu, liuhosi Autoridade Munisípiu Dili (AMD) la autoriza komunidade hodi haloot mate-isin iha uma oin, tanba Governu prepara ona fatin ba hakoi mate isin, hanesan rate Becusse no daudaun prepara semitériu Metinaro atu komunidade sira utiliza hodi hakoi mate.
“Tuir ha’u hatene, fulan haat liubá iha familia ida hakoi mate tesik ba área Comoro, maibé hosi ne’e laiha no hothotu hatene katak Governu harii ona fatin atu hakoi ema mate, ne’ebé hakarak ka lakohi tenke ba fatin ne’ebá,” Prezidente Autoridade Munisípiu Dili, Guilhermina Filomena Saldanha, hateten ba jornalista sira iha resintu AMD, iha-fin-de-semana.
“Agora fatin hothotu mak ita hakoi (mate-isin) iha uma. Uma ita hatene fatin atu hela no rate mak ita hakoi mate, tanba ne’e ba sira ne’ebé hakoi mate iha uma favór ida la’os ona tempu atu hakoi mate iha uma, tanba mate ne’e ba hakoi iha rate,” Autoridade ne’e reforsa.
Tuir nia, durante ne’e Autoridade Munisípiu Dili iha delegadu, xefe aldeia no xefe suku sira mak iha terrenu atu fó informasaun ba komunidade sira atu labele hakoi ema mate iha uma oin, maibé ba hakoi iha rate.
“Agora triste tebes, tanba fulan haat no lima liubá kotuk iha komunidade ida hakoi iha ne’ebá (área Comoro). Fofoun ba dehan la’e, derrepente sira kee hakoi tiha ona ba ne’ebá. Ho ida ne’e, prejudika mós ba saúde, tanba ita uza bee mai hosi rai, ema mós hakoi besik iha ne’ebá, ita-nia foer mós tuun hotu ba ne’ebá, entaun bele dehan fó mós impaktu ba ita-nia saúde, la’ós saúde ita hakoi mate, maibé komunidade enjerál mós fó impaktu ba Díli,” nia dehan.
Notísia relevante:Semitériu Because nakonu sei utiliza semitériu públiku foun iha Metinaro
Jornalista : Nelia Fernandes
Editór : Rafy Belo
