iklan

EKONOMIA, HEADLINE

Governu prevee millaun $201,7 iha fundu infraestrutura tinan 2023

Governu prevee millaun $201,7 iha fundu infraestrutura tinan 2023

Traballadór sira hosi empreza responsável projetu halo reabilitasaun estrada Tasi-tolu no Polísia tránzitu organiza transporte rodoviáriu sira ne’ebé liu iha área reabilitasaun, kuarta (27/04). Imajen Tatoli/António Daciparu

DILI, 10 outubru 2022—VIII Governu Konstitusionál iha tinan 2023 prevee orsamentu millaun $201,7 iha fundu infraestrutura inklui empréstimu externu, hodi finansia projetu 849, ba programa 26 no sub-programa 70.

Bazeia ba livru orsamentál fundu infraestrutura, iha tinan oin, fundu infraestrutura foku ba finansiamentu prioridade ba projetu ein kursu ho projetu 297, kontratu tinan 2021/2022 ho projetu 130 no projetu iha faze preparasaun ho projetu 422.

Programa iha fundu infraestrutura tinan 2023 ho totál 26, kompostu hosi jestaun finansa públika iha neen (1%), kultura no patrimóniu rua (0,2%), estrada no ponte 422 (50%), dezenvolvimentu urbanu no rurál 15 (2%), aprosima servisu Tribunál ba populasaun 4 (0,5%), telekomunikasaun lima (1%), seguransa nasionál 37 (4%), defeza nasionál 21 (2%), asesu ba justisa ida (0,1%), jestaun rekursu petrolíferu no minerál tolu (0,4%), garante liberdade espresaun no asesu informasaun haat (0,5%), transporte lima (1%), boa governasaun no jestaun instutisionál 40 (5%), agrikultura 20 (2%), bee no saneamentu 24 (24%) no eletrisidade 102 (12%).

Nune’e mós, saúde 17 (2%), aeroportu 14 (2%), portu 12 (1%), manutensaun, reabilitasaun no resposta ba infraestrutura danifikada tanba kalamidade 24 (3%), edukasaun no formasaun 17 (2%), igualdade jéneru no inkluzaun sosiál 23 (3%), protesaun no konservasaun ambiente rua (0,2%), turizmu neen (1%), investimentu no diversifikasaun ekonómika 14 (2%), no ordenamentu territóriu hitu (1%).

Notísia relevante: Governu submete ona proposta lei OJE 2023 ba PN

Durante preparasaun proposta Orsamentu Jerál Estadu (OJE) 2023, Konsellu Administrasaun Fundu Infraestrutura (CAFI, sigla portugés) emite deliberaraun 07 fevereiru 2022, númeru 006/CAFI/II/2022, hamutuk ho pedidu submisaun proposta foun atu halo avaliasaun ba projetu foun, ne’ebé finansia hosi fundu infraestrutura iha loron 31  marsu 2022.

Avaliasaun projetu ne’e inklui submisaun no avaliasaun proposta foun fundu infraestrutura, hanesan parte integrál ba prosesu orsamentál. Nune’e iha tinan 2022, Sekretariadu Grande Projetu  simu proposta atu halo avaliasaun iha tinan 2023.

Proposta ba projetu tinan 2023 ho kategoria longu prazu hamutuk iha projetu 69 ho kustu $641.363.520, kurtu prazu iha projetu 24  ho kustu $321.425.963, estudu iha projetu 18 ho kustu $285.346.000, no avaliasaun iha projetu neen ho kustu $36.077.963.

Fundu infraestrutura estabelese iha tinan 2011, ho objetivu atu finansia projetu infraestrutura sentrál no kapitál dezenvolvimentu, inklui apoiu implementasaun Planu Estratéjiku Dezenvolvimentu (PED).

Desde kriasaun fundu iha tinan 2011 to’o agora, iha ona projetu 1.972 inklui 1.096 ho kustu biliaun $5,4, ne’ebé ezekuta ona biliaun $3,3 (60%), kompostu hosi estrada no ponte (52%) ho alokasaun millaun $104,1, aeroportu (9%) millaun $17,5 telekomunikasaun (8%) millaun $16,1, urbanu no rurál (4,5%) millaun $4,5, agrikultura (4%) millaun $8,3 no setór seluk (22,5%) millaun $46,7.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!