VIQUEQUE, 10 outubru 2022 (TATOLI)–Ministru Justisa (MJ), Tiago Amaral, segunda ne’e, lansa atendimentu rejistu online ba sertidaun moris no Billete Identidade (BI), iha postu administrava Uatulari, munisípiu Viqueque.
Tuir Ministru, Diresaun Jerál Servisu Rejistu Notariadu (DJSRN) kontinua halo atendimentu trata dokumentu iha postu administrativu hodi fasilita abitante sira.
“Ohin Rejistu Notariadu deside mai postu Uatulari hodi halo atendimentu ba idozu sira atu evita movimentu abitante ba munisípiu. Entaun atividade ida-ne’e durante loron-10,” Ministru hateten hafoin lansa programa iha edifísiu administrativa Uatulari, segunda ne’e.
Atendementu hahú horseik iha suku Uaitame ba idozu 200 resin no daudaun fó atendimentu ba suku Vessoru 200 resin.
Notísia relevante: Rejistu Notariadu atende BI no Sertidaun Moris iha Uatulari
MJ liuhosi DJRRN simu ona lista benefisiáriu hosi postu Uatulari hamutuk 5.000 resin, nune’e parte diresaun prepara ona sertidaun no BI hamutuk 10.000 hodi halo atendimentu ba abitante sira.
“Ha’u espera abitante sira bele hetan atendimentu di’ak durante loron-10 iha postu ne’e,” nia akresenta.
Biban ne’e, nia husu ba abitante no autoridade sira hodi koopera hodi atividade la’o ho di’ak.
“Ita fó prioridade atendimentu ba idozu tanba sira labele la’o bá munisípiu. Hafoin Uatulari hotu sei kontinua ba postu seluk no atividade ne’e sei la’o to’o tinan 2023,” nia tenik.
Iha fatin hanesan, Administradór postu Uatulari, Manuel do Rosário, agradese ba Ministru Justisa no ekipa DJRRN ne’ebé mai postu hodi halo atendimentu ba idozu sira tanba durante ne’e populasaun sira tenke halo viajen bá munisípiu Viqueque ne’ebé ho distánsia dook, maibé oportunidade ida-ne’e sira bele trata dokumentu besik.
“Atendementu ba loron-10 de’it ha’u hanoin la to’o, maibé depende ba atendimentu se lalais parese sei to’o. Abitante idozu hosi postu Uatulari ho idade 60 ba leten hamutuk 25.000 maka laiha sertidaun moris no BI,” nia dehan.
Jornalista : Vitorino Lopes da Costa
Editora : Julia Chatarina
