DILI, 10 outubru 2022 (TATOLI)–Ministériu Petróleu no Minerál (MPM) ezekuta ona Orsamentu Jerál Estadu (OJE) tinan 2022 ho montante $10.254.665,53 ka 87% hosi totál alokasaun $82.620.903.
“Orsamentu alokadu fahe ba Timor GAP, E.P hamutuk millaun $62, Autoridade Nasionál Petróleu no Minerál (ANPM) millaun $8,5, Institutu Petróleu no Jeolojia (IPG, sigla portugés) millaun $4, Konsellu Mineiru Timor-Leste (CMTL, sigla portugés) $600.000, no MPM rasik millaun $18,” Ministru Petróleu no Minerál, Víctor da Conceição Soares, informa hafoin partisipa audiénsia públika OJE 2023 ho Komisaun D ne’ebé trata asuntu ekonomia no dezenvolvimentu, iha rezidénsia ofisiál Prezidente Parlamentu Nasionál, iha Farol, segunda ne’e.
Notísia relevante: ANPM utiliza Portu Tibar sai baze lojístiku iha prosesu dezmantelamentu Bayu-undan
Bazeia ba portál transparánsia katak, OJE 2022 ne’ebé alokadu ba MPM hamutuk $82.620.903, kompostu hosi kompromisu $97.480,37, obrigasaun $43.459,18, atuál $72.225.279,92, no saldo $10.254.665,53.
“Iha audiénsia públika ho Komisaun D, ami relata no esplika ezekusaun ba deputadu sira, ikus mai sira konvensidu tanba sira mak superviziona tanba defende setór petróleu tanba sustenta mákina Estadu tomak iha tempu naruk,” nia akresenta.
Iha biban hanesan, Deputada Bankada Komisaun D, Virgínia Ana Belo, preokupa tanba MPM hanesan ministériu ne’ebé buka mina, signifika sira mak buka osan ba Estadu tomak maibé realidade progresu Greater Sunrise to’o agora la la’o.
“Hosi reuniaun sira ne’ebé realiza durante tinan-rua, tuir loloos progresu ne’e tenke la’o ona ba oin nune’e iha tinan 2026 ita bele hetan ona mina atubele sai alternativa ida hosi kampu Bayu-undan,” nia preokupa.
Reprezentante povu ne’e husu ba Governu, liuliu MPM atu aselera prosesu Greater Sunrise nune’e bele substitui kampu Bayu-undan ne’ebé besik dezmantela ona.
Jornalista : Antónia Gusmão
Editora : Julia Chatarina
