MSSI prioritiza programa boa-governasaun ho inkluzaun sosiál
DILI, 10 outubru 2022 (TATOLI)-Ministériu Solidariedade Sosiál no Inkluzaun (MSSI), iha proposta Orsamentu Jerál Estadu (OJE) 2023 prioritiza programa boa-governasaun, jestaun instituisional ho igualdade jeneru no inkluzaun sosiál.
“Planu ba tinan oin ministéiru iha programa rua’’, Vise Ministra MSSI, Signi Chandrawati Verdia, hato’o bainhira halo aprezentasaun proposta OJE 2023 iha audénsia públika ho komisaun F ne’ebé trata asuntu Saúde, Seguransa Sosiál no Igualidade Jeneru iha Parlamentu Nasionál, segunda ne’e.
Durante audénsia, Vise MSSI ne’e hato’o mós progresu ba rezultadu serbisu implementasaun programa sira ho ezekusaun OJE 2022.
Notísia relevante: Trimestre datoluk MSSI ezekuta OJE 2022 ho pursentu 17,9
Tuir livru anexu XI planu anuál ba serbisu no entidade setór públiku administrativu, ba 2023 MSSI prevee $30,717,108. MSSI prioritiza programa rua mak boa-governasaun no jestaun instituisional prevee $ 7,869,807 ho nia sub-programa boa-governasaun nia atividade lima, sub-programa jestaun instituisional ho atividade 10, sub-programa parseria nia atividade rua.
Daruak, programa igualdade jeneru no inkluzaun sosiál prevee $ 22,847,301, ho sub-programa protesaun solidariedade sosiál no inkluzasaun ho atividade implementasaun estratéjia nasionál protesaun sosiál, sub-programa protesaun no promosaun direitu ema ho defisiénsia ho atividade promove direitu portadór defisiénsia inteletuál, atividade monitorizasaun implementasaun PAN ba ema ho defisiénsia, promosaun direitu ema ho defisiénsia, konsellu nacional ba ema ho defisiénsia.
Sub-programa re-abilitasaun no re-integrasaun ema ho problema saúde mentál no defisiénsia ho atividade apoiu resgate ba ema ho defisiénsia mentál konfinamentu iha uma, atividade empoderamentu no re-integrasaun komunitária.
Sub-programa apoiu veíkulu funerál no kaixaun ho atividade apoiu família em-lutada, transladasaun falesimentu iha esteriór.
Sub-programa bolsa da mãe ho atividade subsídiu apoiu, dadus rejistu no verifikasaun bolsa da mãe, subsídiu apoiu jerasaun foun ba feto ne’ebé isin rua no labarik ho idade menus hosi tinan tolu no labarik ho defisiénsia.
Sub-programa asisténsia sosiál mak atividade ajuda umanitária, apoiu emerjénsia komunidade afeta dezastre naturál. Sub-programa inkuzaun sosiál ho atividade parseria ho instituisaun solidariedade sosiál ba protesaun no re-integrasaun ba komunidade no inkluzasaun sosiál, atividade partisipasaun iha arte , kultura, kapasitasaun komunidade inkluzaun sosiál.
Sub-programa re-integrasaun komunitária ho atividade reintegrasaun ba labarik iha konflitu ho lei, prizoneiru no eis-prizoneiru, atividade re-integrasaun LGBT, tráfico de pessoas e idosos abandonados à comunidade, reintegrasaun ema ho afetadu droga no konflitu pasadu iha komunidade.
Sub-programa implementasaun NAP-rezolusaun 1325 ONU ho atividade promove inisiativa feto ba pás no koezaun sosiál, sub-programa implementasaun NAP ho atividade haat, sub-programa protesaun labarik iha risku no perigu ho atividade rua.
Jornalista : Nelson de Sousa
Editora : Rita Almeida
