Ohin, PN hahú halo audiénsia públika ba proposta-lei OJE 2023
DILI, 10 outubru 2022—Parlamentu Nasionál (PN) liuhosi komisaun sira, segunda ne’e, hahú halo audiénsia públika ba proposta-lei númeru 46/V(5a)-Orsamentu Jerál Estadu (OJE) ho entidade Estadu hamutuk 109 ne’ebé mak hola parte iha perímetru orsamentál, durante semana rua ba oin.
Proposta orsamentu tinan ne’e ho despeza globál $3.155.715.306, kompostu hosi despeza ba admnistrasaun sentrál $2.800.000.000, seguransa sosiál $235.715.306, no Rejiaun Administrativa Espesiál Oé-cusse Ambeno (RAEOA) $120.000.000.
Tetu agregadu administrasaun sentrál $1.800.000.000 esklui ona Fundu Kombatente Libertasaun Nasionál (FKLN) $1.000.000.000, Seguransa Sosiál millaun $235.715.306 no RAEOA $120.000.000.
Distribuisaun tetu agregadu orsamentu administrasaun sentrál OJE 2023 bazeia ba setór importante sira iha Planu Estratéjiku Dezenvolvimentu, ba setór enkuadramentu institusionál hetan alokasaun 38%, tuir kedan ho kapitál sosiál 33%, dezenvolvimentu infraestrutura 22% no dezenvolvimentu ekonómiku 7%.
Notísia relevante: Meza PN baixa proposta lei OJE 2023 ba komisaun C
Orsamentu ne’e sei uza hodi finansia programa 45 liuhosi atividade prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna.
Bazeia ba kaleindáriu elaborasaun OJE 2023, diskusaun no aprovasaun jeneralidade, espesialidade sei hahú iha loron 07 novembru 2022, no aprovasaun finál globál iha loron 18 novembru no envia ba Prezidente Repúblika hodi halo promulgasaun iha loron 22 novembru.
Kalendáriu ne’e tuir ona espíritu lei foun Enkuadramentu Orsamentál ne’ebé mak promulga ona iha fulan-fevereiru liubá, ne’ebé lei estruturante ne’e sai nu’udar baze ida ba Reforma Jestaun Finanseira Públika.
Jornalista : Antónia Gusmão
Editora : Julia Chatarina
