DILI, 10 outubru 2022 (TATOLI)-Primeiru Ministru (PM) iha proposta Orsamentu Jerál Estadu (OJE) 2023 prevee $4,400,630, hodi kontinua implementa programa prioridade rua.
“Ohin, ita aprezenta orsamentu gabinete Primeiru-Ministtru nian ho programa rua seguransa ho boa-governasaun no jestaun institusional’’, dehan Xefe Gavinete PM, Azevedo Lourenço da C. Amaral, ba jornalista sira hafoin audénsia públika ba proposta OJE 2023 ho komisaun A ne’ebé trata asuntu Justisa no Konstituisional iha Parlamentu Nasionál, segunda ne’e.
Nia mós atualiza ba deputadu sira iha komisaun kona-ba ezekuasaun OJE 2022 gabinete PM nian daudaun to’o ona 91%, hodi implementa programa rua ba apoiu seguransa ho boa-governasaun no jestaun institusional.
Atualiza mós kona-ba gabinete PM liu hosi rezolusaun Konsellu Ministru kria kadeia valór fó mandatu ba Primeiru Ministru lidera komisaun inter-ministeriál kadeia valór ne’ebé tau matan ba setór produtivu ho nia serbisu apoiu koordenasaun.
Nia hateten programa tinan ne’e sei kontinua nafatin iha tinan oin. Hanesan kadeia valór halo funsaun koordenasaun ajuda ministéiru ida-idak hanesan Ministéiru Turizmu Komérsiu no Indústria (MTKI), Ministéiru Agrikultura no Peska (MAP) no sira seluk ne’ebé programa hotu ne’ebé ligadu ho kadeia valór implementa hosi ministériu ida-idak aliña kontribui ba programa Governu.
Tuir livru anexu XI planu anuál ba serbisu no entidade setór públiku administrativu, ba 2023 gabinete PM iha programa seguransa nasionál ho sub-programa pas no seguransa interna ho atividade sekretariadu komisaun interministeriál seguransa.
Programa boa-governasaun no jestaun instituisional ho sub-programa boa-governasaun nia atividade planeamentu, dezenvolvimentu estratéjiku no orientasaun polítika, apoiu jurídiku, kooperasaun entre ajénsia nasionál no internasionál, sub-programa jestaun instituisional ho atividade rua.
Sub-programa supervizaun no orientasaun reforma ba implementasaun programa governamental ho atividade ida.
Notísia relevante: Gabinete PM prioritiza programa rua iha OJE 2022
Jornalista : Nelson de Sousa
Editora : Rita Almeida
