DILI, 10 outubru 2022 (TATOLI)–Primeiru-Ministru (PM), Taur Matan Ruak, no Diretora Ezekutiva empreza petrolífera Woodside, Meg O’Neill, kinta semana kotuk, hala’o enkontru virtuál hodi diskute kona-ba prosesu dezenvolvimentu projetu estratéjiku iha kampu Greater Sunrise.
“Durante enkontru minutu 30, Xefe Governu agradese no apresia Woodside, ba parseria durante ne’e ho Governu Timor-Leste iha atividade petrolífera. Governu Timor-Leste kontinua iha interese halo parseria ho Woodside ba futuru mai, ba viabilizasaun projetu estratéjiku Greater Sunrise hodi bele kontribui hasai povu Timor-Leste hosi kiak, tanba Timor-Leste kuaze depende ba fundu petrolífera iha prosesu dezenvolvimentu nasionál,” refere nota ne’ebé Agencia Tatoli asesu hosi Gabinete Primeiru-Ministru (GPM), segunda ne’e.
Notísia relevante: PR Horta vizita Austrália sei ko’alia prosesu dezenvolvimentu Greater Sunrise
Xefe Ezekutivu dehan, deskobrimentu kampu Gretar Sunrise hahú kedas iha tinan 40 ba kotuk, maibé to’o agora seidauk dezenvolve, ne’ebé parte sira ne’ebé envolvidu lakon rekursu barak, tanba ne’e agora momentu atu hetan solusaun di’ak ba dezenvolvimentu Greater Sunrise nian.
Aleinde ne’e, Primeiru-Ministru fiar katak Woodside, Timor GAP, E.P no parseiru joint venture sira bele halo esforsu tékniku rápidu hodi realiza projetu boot ne’e ho lais no di’ak liu hodi fó benefísiu ba povu Timor-Leste, Austrália no parte envolvidu sira.
Xefe Ezekutivu afirma, Governu Timor-Leste sei halo buat hotu hodi serbisu hamutuk ho Governu Austrália bele viabiliza no ajuda projetu bele implementa.
Diretora Ezekutiva Woodside, Meg O’Neill, sente kontente no orgullu ko’alia direta ho Primeiru-Ministru, Taur Matan Ruak, hodi fahe hanoin no idea kona-ba prosesu dezenvolvimentu Greater Sunrise.
Woodside kontente bele serbisu hamutuk ho Governu Timor-Leste iha atividade esplorasaun petrolífera nian.
Meg O’Neill agradese ba Primeiru-Ministru, ba kompromisu no esforsu sira ba esplorasaun Greater Sunrise.
Estadu Timor-Leste liuhosi Timor GAP, E.P hola parte iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.
Jornalista : Antónia Gusmão
Editora : Julia Chatarina
