DILI, 10 outubru 2022 (TATOLI)—Diretór Diresaun Nasionál Empregu Exteriór (DNEE), Filomeno Soares, informa, timor-oan 2.080 hetan ona oportunidade hodi bá serbisu iha Austrália durante fulan-10, hahú janeiru to’o outubru, liuhosi Sekretaria Estadu Formasaun Profissional no Empregu (SEFOPE).
“Traballadór ne’ebé bá serbisu iha Austrália kompostu hosi mane 1.470 feto 610. Governu nia planu tinan ne’e sei lori traballadór serbisu iha Ustrália ho númeru másimu 2.500 no mínimu 1.500,” Diretór hateten ba Agência Tatoli, iha salaun Tower Bar, Fatuhada, segunda ne’e.
Aleinde ne’e, ohin DNEE fó tan Pre-Departure Breafing (PDB) ba kandidatu traballadór timor-oan na’in-96 ne’ebé atu bá serbisu iha Austrália iha fulan-outubru nia-laran.
Programa PDB bazeia ba kritéria ne’ebé empregadór hosi Australia husu, tanba faze ida-ne’e hanesan ikus ne’ebé atu fahe informasaun relasiona ho kultura, lei, no regulamentu serbisu balun iha Austrália.
Notísia relevante: Traballadór timor-oan 295 sei bá serbisu ho empreza 16 iha Austrália
Realizasaun programa PDB ne’e rasik durante loron-rua nia-laran, nune’e Diretór husu ba joven sira ne’ebé hetan ona oportunidade atu aproveita didi’ak hodi apreende, karik iha buat ruma la kompreende tenke husu formandu sira atubele klarifika, tanba ne’e sei ajuda banhira hala’o serbisu iha Austrália.
Nia husu ba joven sira ne’ebé iha tempu badak atu bá serbisu tenke hatudu komportamentu serbisu di’ak tanbá liuhosi komportamentu maka sei determina empregadór atu foti traballadór seluk hosi Timor-Leste, hodi redus númeru dezempregu iha rai-laran.
“Ha’u husu traballdór sira aproveita didi’ak oportunidade ne’e tanba daudaun ne’e problema boot liu iha Austrália maka traballadór sira halai sai hosi sistema. Husu ba imi ne’ebé foin hetan oportunidade atu bá serbisu, labele fiar traballadór tuan sira ne’ebé halai ona hosi sistema, tanba ses hosi sistema sei taka dalan ba empregadór atu emprega tan ita-nia joven timor-oan sira ne’ebé hein hela oportunidade ba serbisu,” nia fó hanoin.
Jornalista : Arminda Fonseca
Editora : Julia Chatarina
