Autoridade Uaimori husu komunidade kuidadu uma hodi labele akontese indénsiu
VIQUEQUE, 11 outubru 2022 (TATOLI)–Xefe suku Uaimori, postu administrativu Viqueque villa, munisípiu Viqueque, Francelino António Gomes, husu komunidade tenke kuidadu ho uma hodi labele akontese insédiu tanba akontese beibeik ona.
“Atu evita inséndiu, ha’u husu komunidade bainhira sai hosi uma tenke hamate lilin no ahi eletrisidade tanba foin lalais iha loron domingu dadeer, komunidade ida sunu lilin no haluha hamate depois nia ba igreja ahi han tiha nian uma,” Xefe suku hateten ba Agência Tatoli, iha postu Viqueque villa, tersa ne’e.
Akontesimentu ahi han uma-ida iha aldeia Fahi Naneruk, iha loron domingu (09/10) maizumenus tuku 07:00 dadeer, ne’ebé sasán sira iha uma-laran kuaze ahi han hotu.
“Ha’u bá haree direta sasán sira iha uma-laran nein salva ida. Uma-na’in haktuir dadeer ne’e nia sunu lilin maibé haluha hamate no ba igreja. Ho akontesementu ida-ne’e maka dalan ida, komunidade bainhira ba fatin ruma keta haluha hamate ahi iha uma laran,” nia akresenta.
Notísia relevante: Ahi han uma-rua durante inséndiu iha aldeia Bahabunac Viqueque
Apoiu Emerjénsia Protesaun Sivil munisípiu Viqueque halo ona verifikasaun no apoiu pakote emerjénsia ba vítima.
“Akotesementu ne’e ho kategoria estragu totál no ita-nia ekipa hosi parte Protesaun Sivil fó ona apoiu emerjénsia ba vítima inséndiu,” nia tenik.
Pakote emerjénsia kompostu hosi foos, supermie, mina, sanan, lona, bikan, kanuru, biskuit no seluk tan.
Jornalista : Vitorino Lopes da Costa
Editora : Julia Chatarina
