Institutu Nasionál Kombate HIV-SIDA halo advokasia ba autoridade Covalima
COVALIMA, 11 outubru 2022 (TATOLI)–Vise-Ministru Administrasaun Estatál (STAE), Lino de Jesus Torrezão, informa Institutu Nasionál Kombate HIV-SIDA halo advokásia ba autoridade lokál hodi hala’o nia papel atu prevene sidadaun afetadu ba moras HIV-SIDA.
Notisia Relevante: Institutu Nasionál Kombate HIV-SIDA hala’o sensibilizasaun ba komunidade Suai Loro
Bazea ba Dekretu-Lei númeru 3/2016 fó kompeténsia ba prezidente autoridade no administradór postu administrtaivu sira iha Covalima, oinsá atu kopera hamutuk ho liña ministeriál, nune’e hala’o servisu deskonsentrasaun iha munisípiu.
“Ita-bele hatene katak iha munisipiu prezidente autoridade mak iha kompeténsia tomak atu hala’o sira-nia planu no programa tanba ne’e autoridade nia papel importante atu prevene moras HIV-SIDA,” Governu Lino de Jesus Torrezão hateten ba jornalista sira, iha salaun Administrasaun Munisipiu Covalima (AMC), Sukaer Laran, tersa ne’e.
Hafoin autoridade sira partisipa Instituisaun Nasionàl Kombate HIV-SIDA, I.P hamutuk ho Ministériu Administrasaun Estatál (MAE) realiza workshop munisípiu hamutuk ho autoridade munisípiu Covalima kona-ba papel autoridade lokál ba prevensaun HIV-SIDA iha Timor-Leste (TL), sira mós hamutuk ho xefe suku sira atu fahe informasaun ba komunidade sira.
Prezidente Institutu Nasionál Kombate HIV-SIDA Atanasio de Jesus esplika, Institutu Nasionál Kombate HIV-SIDA realiza Workshop ba autoridade sira atu kontrola joven sira halo ransu livre no seksu livre iha Covalima.
“Ami-nia objetivu loloos oinsá líder komunitária ne’ebé iha kompeténsia atu kontrola joven ne’ebé ransu no sexu livre tanba bainhira prevene ona ransu no sexu livre. Se bainhira ransu sexu livre no droga makaas iha ita-nia nasaun, ita labele salva ona,” nia informa.
Ho nune’e, molok atu tama tenke ko’alia uluk ona ho autoridade lokál sira hodi kontribui idea nune’e bele rekomenda ba na’in-ulun sira hodi foti desizaun.
“Munisipiu ne’ebé dadus HIV aas ami sei halo advokasia oinsá autoridade iha kompromisu no foti desizaun ida hodi autoridade. Ami bele hato’o ba iha konsellu ministru no parlamentu,” nia hateten.
Tuir dadus jerál ne’ebé institutu Nasionál Kombate HIV-SIDA rejista, sidadaun afetadu HIV-SIDA hamutuk 1.704 no hosi númeru ne’e mate na’in-271, na’in-871 halo tratamentu no na’in-369 Drop Out (DO).
Dadus sidadaun afetadu HIV-SIDA ne’e ho totál ema hamutuk 1.704 no hosi númeru ne’e munisípiu Dili mak okupa primeiru lugar ho ema afetadu hamutuk 1.268, Bobonaro okupa segundu lugar ho númeru hamutuk 105, Covalima okupa terseiru lugar ho númeru na’in-75.
Jornalista : Celestina Teles
Editór : Cancio Ximenes
