DILI, 11 outubru 2022 (TATOLI)–Koordenadór Jerál ba Unidade Kooperasaun Parseria (UCP-sigla portugés), Ministéiru Solidariedade Sosiál no Inkluzaun (MSSI), João Coimbra, hateten MSSI hahú ona prodús lista pagamentu subsídiu $200 ba uma kain.
Notísia Relevante: Subsídiu $200 ba uma kain sei lansa iha 16 novembru
“To’o ohin mak buat ne’ebé ami halo mak produsaun lista pagementu ba benefisiáriu sira, ita hahú ona prodús lista pagamentu,” João Coimbra hateten ba Agência Tatoli, iha nia kna’ar fatin Caicoli, Dili, tersa ne’e.
Produsaun ba lista pagamentu ne’e, nia informa, hela munisípiu haat mak presiza prodús tan lista pagamentu tanba populasaun barak liu mak munisípiu Dili, Baucau, Bobonaro no Ermera tanba populasaun barak liu.
Aleinde ne’e, MSSI mós hahú ona halo diseminasaun informasaun ba tékniku sira liu-liu ba diretór Sentru Solidariedade Munisipál nian, tanba sira mak sei sai koordenadór imediata iha nivél munisípiu ba subsídiu ne’e.
“Ita presiza fahe mós kona-ba lala’ok pagamentu nian no sé mak iha direitu ba simu subsídiu $200 ba uma kain ne’e, tanba sira rasik mak sei halo diseminasaun tutan ba autoridade munisipál no líder komunitária sira iha suku laran. Ida-ne’e MSSI halo ona no daudaun ne’e sira halo fali iha nivél munisipál nian,” nia dehan.
Maske, nia dehan, oras ne’e iha polemika boot kona-ba sé loos mak atu sai benefisiáriu ba subsídiu $200 ba uma kain ne’e, maibé fiar katak iha tempu bdak sei bele hetan rezultadu klareza hosi leten katak subsídiu ne’e ba ema vulneravel liu ka ba universál.
“Ida-ne’e órgaun kompetente nia desizaun. Ami tékniku prontu ezekuta no tana ne’e mak tékniku prepara daudaun, mezmu seidauk iha desizaun klaru ba asuntu ne’e,” Coimbra dehan.
Tanba ho ida-ne’e mak Sekretária Tékniku iha MSSI nian nafatin halo planu hodi mobiliza tékniku pagamentu sira hosi nasionál ba munisípiu sira.
“Ita nafatin halo planu atu mobiliza tékniku sira hosi nasionál ba munisípiu iha loron 13 novembru tinan ne’e. Depois iha loron rua-tolu sira halo koordenasaun ho nivél munisipál hafoin loron 16 novembru ita bele hahú halo pagamentu,” nia hateten.
Maibé, tuir nia, ida-ne’e planu tentativa de’it maibé se desizaun sira mak fó biban atu halo altersaun ba lei refere mak signifika parte MSSI mós sei haree fila-fali atu ajusta fali.
“Ida-ne’e la fasil ba ita tanba bainhira ita prepara hotu mak desizaun halai sees uitoan mak ita tenke ajusta. Maibé prosesu ajustamentu mak presiza tempu tan,” nia dehan.
MSSI simu ofisiálmente lista pagamentu uma kain nian hosi Ministériu Administrasaun Estatál (MAE) hamutuk 39.110.
Notísia Relevante: PR Lú Olo promulga subsídiu $200 ba Uma-Kain
Jornalista : Osória Marques
Editór : Cancio Ximenes
