DILI, 11 outubru 2022 (TATOLI)—Vise-Ministru Finansa, António Freitas, informa, Primeiru-Ministru (PM), Taur Matan Ruak, husu komisaun tékniku sensu uma-kain 2022 aprezenta relatóriu implementasaun programa molok deside estende.
Sensu uma-kain 2022 realiza ona iha loron 05 setembru iha munisípiu hotu, enkuantu iha Dili hahú iha loron 07 setembru, ho durasaun fulan-ida, ne’ebé ramata ona iha loron 05 outubru 2022.
“Ekipa téknika hosi Diresaun Jerál Estatístika prepara hela relatóriu no mós rekomendasaun, entaun rekomendasaun sira ne’e mak depois deside iha komisaun nasionál, ha’u lakohi foti uluk desizaun katak estende ou lae maibé kestaun ne’e ha’u hato’o ona ba ekipa téknika sira hodi prepara relatóriu kompletu liga ba implementasaun sensu uma-kain 2022,” Vise-Ministru hateten hafoin reuniaun semanál ho Primeiru-Ministru iha rezidénsia PM iha Farol, tersa ne’e.
Notísia relevante: Abitante millaun 1 resin partisipa ona sensu uma-kain 2022
Governante ne’e dehan, durasaun implementasaun sensu la’ós ona kada tinan-lima maibé tuir mai kada tinan-10 mak realiza fali sensu.
“Ida-ne’e sensu ba dala-ikus ho durasaun tinan-lima, sensu tuir mai ita halo iha tinan-10 dala-ida. Tanba ne’e atu estende ka lae ne’e ita hein lai rekomendasaun hosi komisaun téknika sensu nian, ne’ebé probabilidade boot estende tanba iha Dili foin atinje de’it 87%, enkuantu haree ba kresimentu uma-kain iha Dili barak tebes, ne’ebé hein de’it rekomendasaun hosi komisaun tékniku sensu,” nia akresneta.
Metodolojia ne’ebé uza iha sensu uma-kain 2022 ne’e ho defaktu, signifika katak ema sira ne’ebé hela liu fulan-neen iha Dili maski iha kartaun eleitorál, atu halo prevensaun labele dupla kontajen, maka iha sensu uma-kain 2022 ne’e uza sistema eletrónika iha tableta. Ekipa sira simu informasaun no manda direta ba data center depois sei halo verifikasaun.
Bazeia ba dadus provizóriu ne’ebé maka daudaun iha hosi sensu uma-kain no populasaun 2022, alista ona uma-kain 235.599 iha Timór laran tomak, ho totál abitante rejistadu hamutuk 1.290.000, ho kompozisaun mane 657.037 no feto 633.021.
Jornalista : Antónia Gusmão
Editora : Julia Chatarina
