Abitante millaun 1 resin partisipa ona sensu uma-kain 2022
DILI, 07 outubru 2022 (TATOLI)–Diresaun Jerál Estatístika (DGE, sigla portugés) hosi Ministériu Finansa (MF), fó sai rezultadu prelemináriu sensu uma-kain no populasaun 2022, ne’ebé partisipa ona hosi abitante 1.290.058.
“Ha’u hakarak informa katak bazeia ba dadus provizóriu ne’ebé maka daudaun iha hosi sensu uma-kain no populasaun, alista ona uma-kain 235.599 iha Timór laran tomak ho kompozisaun mane 657.037 no feto 633.021, ho totál abitante rejistadu hamutuk 1.290.058,” Diretór Jerál Estatístika, Elias dos Santos, informa ba Agência Tatoli, iha ninia knaar fatin, Caicoli, sesta ne’e.
Haree ba persentajen ne’ebé maka iha, kompra ho dadus ne’ebé mak iha, balun persenjen a’as liu tiha, persentajen sei kiik liu maka munisípiu Dili 90%, Baucau 94%, enkuantu munisípiu seluk ne’e liu ona balun 96% to’o 98%.
“Ein jerál hakarak hateten katak maioria (98%) populasaun partisipa ona sensu populasaun no uma-kain 2022, Dili ramata sesta ne’e. Durante ne’e ekipa sira kolleta dadus, ne’ebé ekipa téknika sira hasoru difikuldade barak liu-liu iha munisípiu Dili, tanba ema hotu iha Dili hala’o atividade ekonomia, entaun dala barak entrevistadór sira ba uma mamuk no balun uma taka tanba hotu-hotu okupadu ho serbisu, sabadú no domingu mós ekipa bá maibé ema nafatin laiha,” nia akresenta.
Notísia relevante: PM Taur no família partisipa ona sensu populasaun no uma-kain 2022
Populasaun iha Dili barak liu mak hela iha suku Bairru-Pité, Fatuhada, Madohi, Vila Verde, ne’ebé suku sira ne’e mak balun seidauk partisipa maibé suku sira seluk ne’e partisipa hotu ona.
“Maibé hirak ne’ebé seidauk partisipa sensu mantein iha fatin no ami sei bá vizita nafatin tanba sensu uma-kain ne’e sura mak ema no mós uma-kain. Hanesan ema tékniku serbisu la’o di’ak tanba timor-oan sira ne’ebé mak rekruta serbisu ho di’ak tanba rekruta duni ema kada suku hodi filafali bá nia suku,” nia tenik.
Enkuantu, populasaun barak liu iha Dili hamutuk 292.000, tuir mak Baucau, Ermera no Bobonaro, munisípiu ne’ebé área luan liu mak Manatuto maibé ninia populasaun oituan.
Responsável ne’e dehan, ekipa sei tur hamutuk fali hodi foti desizaun extende tan ka lae ba sensu uma-kain tanba uma-kain balun seidauk partisipa.
Jornalista : Antónia Gusmão
Editora : Julia Chatarina
