DILI, 11 outubru 2022 (TATOLI)— Diretora Servisu Saúde Munisípiu (SSM) Dili, Agostinha Segurado, hateten, ekipa saúde munisípiu Dili hahú distribui ai-moruk abate ba postu administrativu haat iha munisípiu Dili hodi kombate moras dengue.
Servisu Saúde Munisípiu Dili distribui ai-moruk abate ba postu administrativu Dom Aleixo, Cristo-Rei, Vera-Cruz no Na’in Feto tanba risku ba moras dengue.
Notísia relevante:Dengue hamate labarik na’in-55 no pasiente sa’e ba 4.899
“Ita nia ekipa iha semana kotuk fahe ona ai-moruk abate ba postu administrativu haat tanba ita haree área hirak ne’e risku ba moras dengue,” hateten Diretora Servisu Saúde Munisípiu Dili ne’e iha edefísiu Ministériu Saúde, Caicoli-Dili,tersa ne’e.
Alende distribui ai-moruk abate, nia dehan ekipa saúde mós halo sosializasaun tama sai aldeia no suku hodi apela ba komunidade sira atu halo limpeza iha uma ninin sira atu prevene dengue.
Tuir planu iha semana ne’e ekipa saúde munisípiu Dili hala’o enkontru ho Administradór Postu Xefe Suku, Xefe Aldeia, hodi hala’o koordenasaun konjunta ba prevene moras refere.
“Ita planu atu hamutuk mobilizasaun komunidade ba iha partisipasaun limpeza jerál, iha aldeia ka suku, no inklui ita halo koordenasaun ho universidade sira ho eskola sira atubele tau atensaun ba sira nia fasilidade liuliu vazu ai-funan atu troka ka fakar nia-bee no mós áreadór sira ne’ebé sai hanesan risku ba dengue,” katak.
Servisu Saúde Munisípiu Dili halo koordenasaun ho klínika privada sira atu aviza ba komunidade sira liuliu fó mensajem importante sira liga ba dengue nian.
Tuir dadus hahú husi janeiru to’o setembru 2022, Munisípiu Dili nafatin rejista kazu dengue hamutuk 3.828. Kazu dengue mai hosi postu administrativu Dom-Aleixo hamutuk 2.335, Cristo-Rei 555, Vera-Cruz 455 no Na’in Feto 409.
Enkuantu, fasilidade saúde iha munisípiu Dili hanesan Hospitál Nasionál Guido Valadares (HNGV) rejista kazu dengue hamutuk 657, Klínika Fatumeta 335, sentru saúde Comoro 1.478, sentru saúde Vera-Cruz 260, sentru saúde Formoza 703, sentru saúde Becora 266, klínika Moris Foun ida, DMC rua, sentru saúde Ataúro 12,sentru saúde Metinaro 50, klínika Bairru-Pité 60 no klínika Motael na’in-tolu.
Notísia relevante:SSMD husu komunidade hamoos uma-ninin hodi prevene dengue
Jornalista : Felicidade Ximenes
Editór : Florencio Miranda Ximenes
