DILI, 11 outubru 2022 (TATOLI)—Vise-Ministru Finansa, António Freitas, hateten, la’ós maioria tarifa iha portu Tibar sa’e kompara iha Portu Dili, hanesan preokupasaun setór privadu.
“Atu klarifika katak, la’ós tarifa hotu iha Portu Tibar sa’e, tanba ne’e foin lalais ami realiza reuniaun ho importadór sira, katak tarifa boot ligadu ho estivadór ne’ebé operadór portu ho sira-nia mákina hatún no hasa’e kontentór. Tarifa seluk ne’e kompara ho Portu Dili, iha Portu Tibar baratu liu,” Vise-Ministru Finansa hateten hafoin reuniaun semanál ho Primeiru-Ministru, iha Rezidénsia Primeiru-Ministru, Farol, tersa ne’e.
Governante informa mós ba Primeiru-Ministru katak iha sesta semana kotuk realiza reuniaun ida iha Portu Tibar hodi esplika ba importadór sira oinsá mak bele operasionaliza portu ne’e no padraun operasionál saida mak iha Portu Tibar.
Notísia relevante: Governu no Timor Port halo avaliasaun ba atividade Portu Tibar
Aleinde ne’e, Banku Mundiál halo peskiza balun no hatudu katak deskarregamentu kontentór iha Portu Dili bele liu semana tolu maibé iha Portu Tibar bele halo iha oras 24, tarde liu loron-tolu ka semana ida.
“Ha’u iha esperiénsia ida katak, importadór ida nia sasán bele sai ona hosi Portu Tibar menus hosi oras 20. Ko’alia kona-ba valór osan importadór sira seluk hanesan mós ho prestasaun ne’ebé sira hetan. Iha Portu Dili kontentór bele to’o semana tolu no ró tula kontentór sira forma barak iha tasi maibé agora laiha ona, ró ne’e mai diretamente tama iha portu depois karreta no dezkarreta. Portu Tibar ninia sistema operasionál modernu kompara ho portu sira iha Singapura no Surabaya,” nia akresenta.
Portu Tibar hahú funsiona iha loron 30 setembru 2022, ne’ebé tuir planu Governu sei halo inaugurasaun iha loron 30 novembru tinan ne’e.
Jornalista : Antónia Gusmão
Editora : Julia Chatarina
