iklan

EKONOMIA, HEADLINE

Governu no Timor Port halo avaliasaun ba atividade Portu Tibar

Governu no Timor Port halo avaliasaun ba atividade Portu Tibar

Ekipamentu ba deskarregamentu kontentór iha Portu Tibar, sesta (07/10). Imajen Tatoli/Francisco Sony

DILI, 07 outubru 2022 (TATOLI)—Governu no Timor Port hamutuk ho Bolloré inklui setór privadu, sesta ne’e, halo enkontru hodi avalia atividade Portu Tibar, ne’ebé hahú halo operasaun dahuluk ‘go live’ iha loron 30 setembru 2022.

Vise-Ministru Finansas, António Freitas, Imajen Tatoli/Francisco Sony

“Ministériu Finansa ho liña ministeriál mai halo enkontru ho empreza Timor Port, Bolloré inklui setór privadu nasionál no internasionál ne’ebé koopera ligadu ho estivadór no seluk tan. Ita kontinua halo avaliasaun ba atividade Portu Tibar tanba semana kotuk ita hahú ona operasaun,” Vise-Ministru Finansa, António Freitas, hateten iha Portu Tibar, sesta ne’e.

Nia dehan, objetivu halo avaliasaun tanba hakarak hatene lala’ok atividade Portu Tibar kona-ba deskarregamentu, pagamentu taxa no impostu, no seluk tan hafoin halo go live, nune’e rona setór privadu sira-nia hanoin no haree implementasaun sira agora no futuru.

“Iha ita-nia enkontru ne’e atu empreza sira-nia hanoin krítika no preokupasaun, inklui rekomendasaun tanba Portu Tibar foin hala’o atividade, iha buat barak mak ita tenke esplika hodi setór privadu, Timor Port no Governu buka soluasaun,” nia akresenta.

Notísia relevante: Portu Tibar hahú atividade operasionál dahuluk, foti sasán presiza access pass

Diretór Ezekutivu Timor Port SA, Laurent Palayer. Imajen Tatoli/Francisco Sony

Durante enkontru, partisipante sira hato’o preokupasaun kona-ba trata dokumentu no prosesu kontentór iha portu laran ho lalais.

“Ita-nia jestór Timor Port halo esplikasaun kona-ba situasaun no lala’ok, ikus mai ita-nia empreza sira mós kompreende. Ida-ne’e ha’u hanesan lori Governu nia naran kontente,” nia tenik.

Diretór Ezekutivu Timor Port SA, Laurent Palayer, hateten, empreza sira hato’o rekomendasaun kona-ba sistema atendimentu, maibé tanba Portu Tibar  foun ho ekipamentu modernu, nune’e buat hotu tenke tuir nia lala’ok, maibé hosi rekomendasaun sira ne’e ba oin bele halo melloramentu tan.

“Ita-nia portu funsiona semana ida ona ho nia sistema operasaun diferente ho Portu Dili, maibé hosi rekomendasaun sira, saida de’it mak ami bele hadi’a no bele halo nune’e fasilita sira,” nia tenik.

Na’in ba Loja Jacinto, Clarisa Lay. Imajen Tatoli/Francisco Sony

Iha biban hanesan, Na’in ba Loja Jacinto, Clarisa Lay, kontente tanba ohin Governu bele fasilita sira hala’o enkontru ho Timor Port no Bolloré, nune’e bele hato’o preokupasaun.

“Ami-nia preokupasaun no dezafiu mak seidauk tuir saida mak uluk Bolloré no Governu deside, katak kada loron-ida, iha minutu 45, kontentór ida bele sai no ró to’o mai loron-ida bele hatún kontentór 500. Ida-ne’e mak seidauk bele realiza, maibé tanba atividade ne’e foin hala’o semana ida no ohin sira halo ona esplikasaun. Espera ba oin ami-nia preokupasaun sira bele tau konsiderasaun,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!