ADN sosializa prosesu pagamentu projetu ba emprezáriu Bobonaro

BOBONARO, 12 outubru 2022 (TATOLI) — Ajénsia Dezenvolvimentu Nasionál (AND), Institutu Públiku (ADN, I.P, sigla portugés), kinta ne’e sosializa Fluxograma no Checklist kona-ba prosesu pagamentu ba emprezáriu sira iha munisípiu Bobonaro.
Adjuntu diretór ezekutvu ADN, I.P, Januário Maia Guterres, esplika, aprezentasaun Fluxograma ba prosesu pagamentu fundu infraestrutura, empréstimu no projetu liña ministeriál sira bazea deliberasaun númeru 36 ne’ebé maka aprova hosi Konsellu Administrasaun Fundu Infraestrutura (CAFI, sigla portugés).
Ho aprovasaun ne’e orienta ADN no Ministériu Obra Públika (MOP) liuhosi Komisaun Nasionál Aprovizionámentu (CAN, sigla portugés) no Sekretariadu Grande Projetu (SGP) dezeña formatu flowchart atu fasilita no aselera prosesu pagamentu ba fundu infraestrutura sira iha territóriu nasionál.
Notísia relevante: ADN verifika hela dezeñu Planta no Kadernu Enkargu estabelese sentru arkivu istória
Tanba ne’e Januário subliña, ne’e atu fahe nmformasaun ba setór privadu relasiona ho prosesu pagamentu ne’ebé maka governu mak halo prosesu, liuliu ba projetu kapitál dezenvolvimentu sira.
“Objetivu maka ne’e, ita atu halo ninia prosesu pagamentu ne’e efetivu liu, tanba durante ne’e ita-nia setór privadu sira sempre kestiona pagamentu atrazu. Ita sosializa ona ba ministériu sira no ohin ita sosializa iha Bobonaro,” nia ko’alia iha salaun administrasaun Bobonaro.
Durasaun tempu inklui prosesu sira kona-bá fundu infraestrutura no empréstimu totál períodu tempu (loron 26-40) mak hanesan; empreza submete dokumentu ba Project Management Unit (PMU) no Direção Nacional de Estradas, Pontes e Controlo de Cheias (DNEPCC) iha Ministériu Obras Públika hodi halo prosesu, análiza no avalia pedidu pagamentu, Verifika progresu fíziku iha terrenu, avalia dokumentu tékniku no legál, hafoin prepara sertifikadu pagamentu ho durasaun tempu (loron 10-14).
Depois Ajénsia Dezenvolvimentu Nasionál halo inspesaun iha terrenu no prepara relatóriu inspesaun ho tempu (loron 10-14) hafoin Sekretariadu Grande Projetu (SGP), prepara PRT, EV, no TPO ho tempu (loron 3-6 ), Ministériu Finansa no BCTL halo prosesu transferénsia ho tempu (loron 3-6).
Enkuantu ba projetu liña ministeriál sira ho períodu tempu (loron 24-40) mak hanesan, empreza submete dokumentu ba Dono do Projeto, verifika progresu fíziku obra iha terrenu, avalia no analiza dokumentu no prepara sertifikadu pagamentu ho tempu (loron 10-15).
Nune’e hosi parte ADN halo inspesaun iha terenu no prepara relatóriu inspesaun nian ho tempu (loron 10-14 ). Hafoin ne’e dokumentu sei fila-fali ba Dono do projeto prepara CPV, PO no PRT ho tempu (loron 2-7), nune’e Ministériu Finansa (tezouru) prodús TPO no halo transferénsia ho tempu (loron 2-4) hafoin ba banku.
“Ba oin ita-nia governu ho setór privadu tenke kumpre prosesu sira hodi efetiva liután iha prosesu pagamanetu ne’e,” Adjuntu ADN ne’e apela.
Sekretáriu Autoridade Munisípiu Bobonaro, João Fátima do Carmo, agradese ba governu, liuliu ADN ne’ebé maka iha inisiativa di’ak hodi fahe informasaun kona-bá prosesu pagamentu projetu.
“Iha pasadu no mós daudaun ne’e ita-nia maluk emprezáriu sira enfrenta hela prosesu pagamentu, tanba ne’e ho loron ida ohin, ita-nia emprezáriu sira intende di’ak liu prosesu pagamentu,” nia katak.
Prezidente Kámara Komérsiu Timor-Leste (CCI-TL, sigla portugés), munisípiu Bobonaro, Norberto José, haktuir, ho Flouxograma ne’e bele responde ona preokupasaun emprezáriu sira.
“Obrigadu ba ADN ba esforsu tomak, ne’ebé rona setór privadu sira-nia lian. Ita espera ho prosesu sira hanesan ne’e bele fó satizfasaun ba emprezáriu sira,” nia hateten.
Tuir planu, Ajénsia Dezenvolvimentu Nasionál sei fahe informasaun kona-ba asuntu refere ba iha munisípiu 13 no Rejiaun Administrativa Espesiál Oé-Cuse Ambeno (RAEOA).
Notísia relevante: CAFI sei aprova estrada urbana Maliana ho kilómetru 23
Jornalista : Sérgio da Cruz
Editór : Evaristo Soares Martins

