Autoridade hosi Governu hadi’a irrigasaun Paetun Uatulari

VIQUEQUE, 12 outubru 2022 (TATOLI)-–Administradór postu Uatulari, munisípiu Viqueque, Manuel do Rosário, husu Governu hadi’a irrigasaun Paetun ba natar ektare 100 iha suku Matahoi tanba tinan 10 ona abandona.

“Governu presiza hadi’a irrigasaun ne’e hodi povu agrikutór halo fali natar. La’ós povu Uatulari baruk halo natar maibé bainhira irrigasaun a’at sira labele halo natar. Iha tinan ne’e komunidade halo esforsu dezenraska halo natar Paetun maibé uza bee-udan, ne’ebé rezulta oituan maibé natar balun labele halo tanba bee la to’o,” Administradór hateten ba Agência Tatoli iha edifísiu postu admistrativu Uatulari, kuarta ne’e.

Notísia relevante: MAP konsege rezolve irrigasaun haat hosi projetu ualu

Nia dehan, tempu badak sei ba hasoru direta Ministru Agrikultura no Peska (MAP) hodi hadi’a irrigasaun parte Paetun, nune’e povu agrikultór sira halo fali natar.

“Ha’u preokupa tebes no sei ba hasoru ministru hodi lori proposta. Iha tempu uluk, rezultadu ne’ebé haree barak ne’e maka irrigasaun Maleana no seluk mak Uatolari maibé kondisaun ladún di’ak, halo kuaze produsaun menus,” nia akresenta.

Iha fatin ketak, Xefe suku, António Amaral, hateten, nia parte hato’o ona kestaun irrigasaun Paetun Matahoi ba parte relevante maibé to’o agora laiha resposta ruma.

“Tanba ne’e, oportunidade ida-ne’e ha’u hakarak husu ba Governu atu hadi’a irrigasaun hodi komunidade bele halo fali sira-nia natar,” nia hato’o.

Jornalista   : Vitorino Lopes da Costa

Editora        : Julia Chatarina