DILI, 12 outubru 2022 (TATOLI)–VIII Governu Konstitusionál liuhosi Fundu Dezenvolvimentu Kapitál Umanu (FDCH, sigla portugés) prevee ona osan hamutuk $270.600 hodi fasilita bolseiru timor-oan na’in-66 fila kontinua estudu iha Xina bazeia ba dekretu-lei númeru 56/2022 17 de agostu.
“Liuhosi identifikasaun ne’ebé mak FDCH hamutuk ho Ministériu Ensinu Superior Siénsia no Kultura (MESSK) inklui estudante sira iha Xina halo maka hetan ona estudante na’in-66 de’it. Maski antes ne’e iha ona dadus estudante 130 maibé dekretu-lei rekoñese de’it na’in-66 maka iha direitu,” Diretór Ezekutivu FDCH, Cristóvão dos Reis, hateten ba Agência Tatoli, iha ninia knaar fatin, Palásiu Governu, kuarta ne’e.
Notísia relevante: MESSK planeia inisia dekretu-lei apoiu fundu ba bolseiru timor-oan iha Xina
Dekretu-lei númeru 56/2022 17 agostu ne’ebé públika ona iha jornál repúblika ne’e hateten apoiu ne’ebé Governu fó ba estudante timor-oan iha rai li’ur ne’e bainhira akontese situasaun ladi’ak.
Tanba ne’e, FDCH prepara ona fundu ba estudante bolseiru na’in-66 ho montante $270.600 atu apoiu sosa billete aviaun no kustu kuarentena atubele fasilita fila kontinua estudu iha universidade ne’ebé antes ne’e sira estuda.
“Estudante sira hetan direitu atu filafali kontinua estudu iha Xina, ne’ebé identifikadu durante akontese pandemia COVID-19, sira hala’o hela estudu iha Xina. Sira ne’e maka iha tempu besik ha’u garante ona iha outubru nia laran bele kontinua fali sira-nia estudu,” nia akresenta.
Fundu ne’ebé prepara ona sei transfere ba konta bankária kada estudante atu sira bele utiliza hodi kompleta dokumentu, sosa billete aviaun no prepara selu mós kustu kuarentena.
“Ita-nia estudante sira ne’e sei fahe ba grupu rua, ne’ebé kada estudante sei hetan $4.100, fahe ba osan sosa billete $3.600 no kustu kuarentena $400,” nia informa.
Jornalista : Tomé Amado
Editora : Julia Chatarina
