DILI, 12 outubru 2022 (TATOLI)–Ministru Administrasaun Estatál (MAP), Miguel Pereira de Carvalho, hateten MAE propoin Orsamentu Jerál Estadu (OJE) 2023 hamutuk $113.183.197.
“Ohin ami mai aprezenta ezekusaun Orsamentu Jerál Estadu (OJE) 2022 ho nia atividade sira ba Komisaun A Parlamentu Nasionál (PN) no mós proposta OJE 2023 nian ne’ebé mak ita propoin $113.183.197,” Governante ne’e hateten ba jornalista sira, hafoin halo audiénsia ho Komisaun A trata asuntu Justisa no Konstituisional iha Parlamentu Nasionál, kuarta ne’e.
Hosi Sekretariadu Tékniku Administrasaun Estatál (STAE) propoin millaun $1.7 ne’e, hodi halo despeza rutina ba tinan oin maibé ba preparasaun eleisaun jerál no eleisaun parlamentar tinan 2023 nian, STAE propoin millaun $10 inklui prevee millaun$9 ba eleisaun suku tanba membru konsellu suku iha territóriu nasionál hamutuk 8.500.
“Maibé osan miliaun $1.7 mak ita sei aloka tinan oin no osan ba eleisaun rua nian aloka ho osan dotasaun tudo Governu nian,” nia dehan.
Entretantu ba Arkivu Nasionál propoin osan rihun $781 hodi realiza atividade Arkivu Nasionál nian iha tinan oin, maibé ba munisípiu sira osan sa’e ba millaun $81.1 no hosi osan ne’e sei desagrega ba munisípiu sira.
Ba munizípiu Aileu iha millaun $4.5, Ainaro millaun $4.9, Ataúro millaun $2.3, Baucau millaun $7.6, Bobonaro millaun $6.7, Covalima millaun $3.7, Dili millaun $3.3, Ermera millaun $7.4, Lautém millaun $5.8, Liquiça millaun $4.9, Manatuto millaun $5.7, Manufahi millaun $5.2 no Viqueque millaun $6.9.
“Purtantu osan ne’ebé ita propoin ba tinan oin barak liu mak iha MAE tanba hodi ezekuta ba programa Uma ba Povu. Ia planu sei halo Uma ba Povu besik 4.000 inklui ita sei atribui materiál konstrusaun ba benefisiáriu hamutuk 6.000,” nia dehan.
Hosi osan hirak ne’e, sei finansia ba Programa Mão de Obra iha Postu Adminiatrativu (PMOPA)ne’ebé sei aloka osan $100.000 ba kada postu, hodi implementa atividade 3.500. no kada atividade sei entrega ba ema na’in-20.
“Ida-ne’e hanesan ema sira-ne’ebé hamoos valeta, tesi duut iha dalan, kuda aioan iha fontes de água sira. Ida-ne’e sei entrega ba traballadór 70.000. No ita mós sei entrega traballadór 90.000 hodi halo uma kbiit laek ne’e,” MAE dehan.
Ba PNDS regular ne’e, MAE aloka millaun $25 no sei entrega ba traballadór 24.000 no MAE mós sei aloka osan ba programa Movimentu Hafoun Aldeia ne’ebé sei implementa iha aldeia 18 hodi involve ema hotu-hotu iha atividade ne’e, nune’e bele halo dezenvolvimentu iha aldeia laran.
Entretantu OJE 2022 nian, MAE iha osan besik millaun $130 ne’e, Arkivu Nasionál hamutuk $408.000 ho nia ezekusaun atinje ona 75%, Sekretariadu Tékniku Administrasaun Eleitorál (STAE) millaun $9 ho nia ezekusaun atinje ona 84%, osan ba munisípiu sira hotu hamutuk millaun $63 ho nia ezekusaun atinje ona 62%.
“Instituisaun tolu ne’e ezekuta ona osan millaun $203. Hosi ne’e, ita haree ministériu ne’e nia ezekusaun di’ak. Nune’e to’o 26 setembru, MAE ezekusaun OJE 2022 ne’e atinje ona 95%. Hosi ezekusaun ne’e, munisípiu Ermera mak nia ezekusaun boot. Ha’u kontente tebes-tebes, Ermera ho nia ezekusaun atinje ho 83%, tuir mak Covalima ezekuta 80%, Ainaro 79%, Bobonaro 78% inklui Ataúro 43%,” nia hateten.
Jornalista : Osória Marques
Editór : Cancio Ximenes
