MAPKOMS sei asina kontratu ho empreza konstrui edifísiu TATOLI, I.P-RTTL, E.P
DILI, 12 outubru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, informa, Governu liuhosi MAPKOMS sei asina kontratu ho empreza ba estabelesimentu konstrusaun edifísiu própriu ba Agéncia TATOLI, Instituisaun Públiku (TATOLI.IP) no Rádio e Televisão Timor-Leste Empreza Públiku (RTTL, E.P).
Notisia Relevante: Konstrusaun edifísiu TATOLI, I.P no RTTL, E.P iha faze estudu viabilidade
“Edifisiu TATOLI, I.P no RTTL, E.P ne’e projetu ba estudu viabilidade ne’e hetan ona ninia rezultadu, tanba iha CNA kompañia lubuk ida mak konkore no ida mak sai manán-na’in. Agora ramata ona, hela de’it fó tempu ba Ministériu tanba iha klaim ruma sei fó loron 10 ba sira, desde loron 10 ami asina kontratu ona,” Ministru Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, hateten ba Agéncia Tatoli, hafoin halo audiénsia proposta OJE 2023 ho komisaun A trata asuntu justisa no Konstitusionál iha Parlamentu Nasionál (PN), Díli, tersa ne’e.
Tuir nia, ba prosesu konstrusaun depois estudu viabilidade hotu, kuandu aprezenta ona mai depois aprova mak foin halo konstrusaun.
Antes ne’e, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, informa tinan ne’e MAPKOMS loke hikas konkursu ba konstrusaun edifísiu Agência TATOLI Institutu Públiku (TATOLI, I.P) no Rádio e Televisão Timor–Leste, Empreza Públiku (RTTL, E.P) tanba empreza ne’ebé antes ne’e manan konkursu deziste ona.
“Iha tempu ne’ebá, estudu viabilidade ne’e kompañia ida mak manán maibé la konsege halo estudu, tanba kompañia ne’e rasik nia peritu sira iha tiha rai-li’ur. Entaun, iha fulan liubá ami reuniaun iha CAFI husu atu re-konkursu maibé kansela no agora atu halo konkursu foun hodi hetan kompañia ida atu halo servisu ne’e lalais,” Francisco Martins da Costa Pereira Jerónimo hateten.
Notísia Relevante: CAFI Aprova Prosesu Aprovizionamentu Konstrusaun Edifísiu TATOLI,IP-RTTL,EP
Jornalista : Nelia Fernandes
Editór : Cancio Ximenes
