PR Horta kondekora Roy Trivedy ho medalla Grau Orden Kolár Timor-Leste

DILI, 12 outubru 2022 (TATOLI) – Prezidente Repúblika (PR), José Ramos Horta, kuarta ne’e, kondekora Koordenadór Rezidente Nasaun Unida iha Timor-Leste, Roy Trivedy, ho medalla Grau Orden Kolár Timor-Leste.
Orden Timor-Leste kria hosi dekretu-lei númeru 20/2009, 06 maiu, ba prestíjiu no dignidade, demostra rekuñesimentu Timor-Leste ba sidadaun nasionál ho estranjeiru iha atividade profisionál, sosiál ka aktu espontánea erosidade ka altruizmu ne’ebé kontribui signifikativu fó benefísiu ba Timor-Leste ka umanidade.
Koordenadór Rezidente Nasaun Unida iha Timor-Leste, Roy Trivedy, presta servisu alta importánsia ba povu Timor-Leste iha setór oin-oin ba prosesu dezenvolvimentu nasionál iha relasaun entre Nasaun Unida ho Timor-Leste.

“Kondekora medulla Grau Orden Kolár Timor-Leste ba Roy Trivedy, ho nia-signifika katak durante tinan lima fó ona kontribuisaun ba Timor – Leste, liu-liu iha área dezenvolvimentu nasionál, liuliu bainhira Timor-Leste infrenta hela pandemia Covid-19, infrenta inundasaun 04 abríl, UN Agência servisu maka’as hodi ajuda Timor – Leste”, dehan Vise Ministru Negosiu Estranjeiru no Kooperasaun (VMNEK), Julião da Silva iha Palasiu Prezidensiál, Bairru Pité-Dili, kuarta ne’e.
Durante misaun, Vise MNEK dehan Roy Trivedy hamutuk ho Agência Organizasaun Nasaun Unida (ONU) apoia servisu agrikultura, nutrisaun no seluk tán ba povu Timor-Leste.
“Ida ne’e mak ita nia Xefe Estadu valoriza servisu ONU nian hotu liu hosi Roy Trivendy hodi kondekora nian,” akresenta.
Iha biban hanesan, Koordenadór Rezidente Nasaun Unida (ONU) iha Timor-Leste, Roy Trivedy, sente orgullu no fó obrigadu ba Prezidente Repúblika, José Ramos Horta ne’ebé oferese ona medalla osan mean ne’e ba nia.
“Agradese tebes ba Prezidente Repúblika no Povu Timor- Leste ne’ebé valoriza ona ami nia servisu durante ne’e,” nia dehan.
Molok, husik Palasiu Prezidensiál no Timor-Leste, PR Horta mós husik hela lia menon ba nia atu apoiu nafatin Timor-Leste iha servisu saida de’it, liuliu iha área dipolmata nian, hodi hametin nafatin relasaun di’ak entre ONU no Timor -Leste.
Notísia relevante: Misaun ramata, Roy Trivedy despede ho PM Taur
Jornalista: Hortencio Sanchez
Editór : Florencio Miranda Ximenes

