SECoop prevee millaun $4-resin ba proposta OJE 2023

DILI, 12 outubru 2022 (TATOLI)—Sekretária Estadu Kooperativa (SECoop, sigla portugés), iha proposta Orsamentu Jerál Estadu (OJE) 2023 prevee $4,914,715.
Notísia Relevante: SECoop fasilita formasaun kooperativa ba Ema ho Defisiénsia na’in-35
“Orsamentu ba tinan oin ne’e, SECoop prevee millaun $4,914,715,” Sekretáriu Estadu Kooperativa (SECoop), Elizário Ferreira, hateten bainhira halo audiénsia públika ba proposta OJE 2023 ho komisaun C trata asuntu Finansa Públika iha Parlamentu Nasionál, kuarta ne’e.
Nia hatutan, SECoop ninia programa tinan oin nafatin kontinua programa sira-ne’ebé la’o ona tinan ne’e.
Hanesan haktuir iha livru anexu XI planu anuál ba serbisu no entidade setór públiku administrativu, ba 2023 SECoop iha programa dezenvolvimentu rurál no urbanu prevee $2,348,340 ho sub-programa promove estabelese kooperativa ho atividade ualu (8) hanesan dezenvolve kapasidade rekursu umanu kooperativa, apoiu koopertaiva produsaun integrada, jestaun sistema informasaun no komunikasaun, dezeña, konstrui no supervizaun ba konstrusaun no instalasaun sentru kooperativa, promove dezenvolvimentu estratéjiku kooperativa, proporsional asesu finansiamentu no seguru risku ba kooperativa ho reforsa no konsolida juventude iha área kooperativa.
Programa boa-governasaun no jestaun instituisionál prevee $2,566,375 ho sub-programa rua (2) no atividade ualu (8).
Tuir portál transparánsia hosi Ministéiru Finansa iha kuarta ne’e (12/10/2022) fó sai katak, OJE 2022 ba SECoop ho orijen $44,605,547.00, kompromisu sira $$31,997,296.00, obrigasaun sira $$4,010,619.00, atuál $4,040,970.33, saldo $4,556,661.67 no ezekusaun 18.0%.
Nune’e, Elizario Ferreira, kompara ezekusaun bo’ot ba OJE tinan ne’e aloka ba instituisaun ne’e hanesan saláriu bensimentu 60.4%, bens serbisu 13.80%, kapitál menór 52.0 % seidauk ezekutadu, transferénsia públika ezekuta 54.50%.
Maibé ezekusaun mímimu loos tanba hetan alokasaun tan programa Cesta Bázika tinan ne’e iha millaun $40 ba prosesu tarde tanba prosesu sira konkursu entidade seluk akompaña mós tuir no prosesu ne’ebé hakarak garante kualidade nune’e halo prosesu ezekusaun neineik.
Notísia Relevante: SEKoop inaugura sede kooperativa multisetoriál POLKOM Lautém
Jornalista : Nelson de Sousa
Editór : Cancio Ximenes

