Komemora loron mundiál redusaun risku dezastre hanesan loron halo reflesaun

COVALIMA, 13 outubru 2022 (TATOLI)–Reprezentante Prezidente Repúblika, Alexandrino de Araújo Xavier hateten, Komemorasaun loron mundiál risku dezastre naturál hanesan loron reflesaun akontese dazastre naturál iha Timor-Leste.
Notísia Relevante: Reprezentante PR entrega prémiu ba manan-na’in kompetisaun sertame iha Covalima
“Ohin, ita halo komemorasaun ita halo reflesaun akontese dazastre naturál iha tinan 2019 hanesan ahi han uma hosi parte lorosa’e no loromonu, hanesan iha Baucau Quelecai ahi han uma adat lubuk ida no iha fatin-fatin akontese inundasaun boot ema lubuk ida mate,” Alexandrino de Araújo Xavier hato’o liuhosi nia diskursu iha resintu sede suku Suai loro, kinta ne’e.
Ho loron komemosaun ida-ne’e, hanesan eis sekretáriu estadu protesaun sivil, husu fó liman ba malu hodi fó apoiu ba sekretáriu estadu protesaun sivil, maske hasoru difikuldade kestaun finanseriu tanba dezastre la prepra orsamentu anuál.
“Maske tinan ne’e ita bele prepara orsamentu maibé ita la prepra dezastre bainhira mak mai, tanba ne’e komponente hotu atu fó liman ba malu, sekretáriu estadu protesaun hanesan sentru koordenasaun atu halo reflesaun tinan dazastre naturál mundiál no halo mós reflesaun ba tinan dezastre iha ita-nia rai Timor Leste,” nia informa.
Tanba ne’e, nia dehan, komemorasaun loron mundiál redusaun risku dezastre la’ós naran komemorasaun de’it. Husu povu Suai atu haree no akompañia informasaun ne’ebé hamate ema barak inklui Timor-Leste.
“Protesaun sivil iha nasaun seluk, Estadu fó atensaun másimu sira akompaña oinsá atu halo evakuasaun komunidade atu salva sira. Ita Timor, bombeiru servisu makaas, ita iha udan boot no bailoron naruk,” nia dehan.
Bazea ba esperiénsia bailoron naruk ahi han uma kuaze iha Timor laran tomak, momentu ne’e protesaun sivil koordena ho komponente hotu atu servisu hamutuk ho protesaun sivíl hahú hosi Ministériu Administrasaun Estatal (MAE) mak na’in ba povu tomak no ministériu sira seluk.
Sekretáriu Estadu Protesaun Sivil, Joaquim José Gusmão dos Reis Martins, hateten Governu komemora loron mundiál rsiku dezastre iha Covalima tanba tinan-tinan sempre enfrenta dezastre hanesan inundasaun.
“Iha suku Suai Loro, kada tinan mosu dezastre natural, nune’e ho komemorasaun ida-ne’e bainhira akontese dezastre sé mak sei responde uluk dezastre komunidade molok instituisaun sira mai. Tanba ne’e, ita konsentra iha ne’e atu alerta ba ita-nia komunidade,” nia esplika.
Komemorasaun loron mundiál redusaun risku ida-ne’e ho nia tema “Alerte sedu hodi hamenus lakon vida no vítima hanesan liuhosi simulasaun halo preparasaun molok akontese dezastre”, nune’e bele minimiza vítima no lakon vida.
Reprezentante Administradór Munisípiu Covalima, Francisco de Jesus Alves, reforsa ho komemorasaun loron mundiál ida-ne’e bele hasa’e komunidade nia kuiñesementu kona-ba atu salva vida bainhira mosu dezastre naturál.
Iha biban ne’e mós autoridade Covalima hato’o agradesimentu tanba tinan ne’e komemora loron mundial redusaun risku dezastre naturál iha Suai Loro hanesan fatin ne’ebé risku ba dazstre natural.
Jornalista : Celestina Teles
Editór : Cancio Ximenes

