Reprezentante PR entrega prémiu ba manan-na’in kompetisaun sertame iha Covalima
COVALIMA, 13 outubru 2022 (TATOLI)—Reprezentante Prezidente Repúblika Alexandrino de Araújo Xavier, kinta ne’e, entrega prémiu taxa ho osan primeiru lugar kompetisaun sertame iha suku Suai Loro, postu administrativu Suai, munisípiu Covalima.
Notísia Relevante: Komemora loron mundiál redusaun dezastre, Suai Loro realiza kompetisaun sertame
“Kompetisaun sertame ne’e, importa kada eventu hosi enkorja ita-nia oan sira para kontinua iha sertame nune’e sira bele estuda no iha hanoin,” Reprezentante Prezidente Repúblika, Alexandrino de Araújo Xavier, hateten ba jornalista sira hafoin entrega prémiu iha resintu sede suku Suai Loro, kinta ne’e.
Nia parte ko’alia ona ho Sekretáriu Estadu Protesaun Sivil, atu aban bainrua realiza atividade sertame ne’e, se bele matéria foku ba iha área protesaun sivil, nune’e bele hakle’an sira-nia kuñesimentu.
“Ha’u ko’alia ona ho sekretáriu estadu aban bainhira iha sertame tuir mai foku matéria ba protesaun sivíl, nune’e hakle’an labarik sira-nia kuiñesementu kona-ba protesaun sivil tanba protesaun sivil liafuan ida luan maibé iha nia implementasun balun rigorozu no balun sira rasik iha protesaun ba sira-nia aan rasik,” nia dehan.
Reprezentante ekipa juri, João Martins, esplika komisaun organizadora realiza atividade kompetisaun sertame ne’e hodi komemora loron mundiál redusaun risku dezastre ne’ebé aldeia Mane Ikun sai manán-na’in dahuluk.
“Ita hala’o atividade kompetisaun sertame ida-ne’e, aldeia Mane Ikun sai manan-na’in dahuluk ho valór 850, manan-na’in daruak aldeia Sukabi Laran ho valór 800 no manan-na’in datoluk aldeia Loro ho valór 800,” nia hateten.
Matéria realiza atividade sertame ne’e foku liu kona-ba dezastre, nune’e halo simulasaun komunidade sira-bele kompreende oinsá halo alerta sedu ba iha risku dezastre liu-liu akontese iha Suai Loro
Premiu ne’ebé mak komisaun atribui ba manán-na’in sira mak hanesan, primeiru lugar hetan prémeiu taxa ho osan $100, segundu lugar $75.00 no terseitu lugar $50.00
Jornalista : Celestina Teles
Editór : Cancio Ximenes
