DILI, 13 outubru 2022 (TATOLI)—Sekretáriu Estadu Arte no Kultura (SEAK), Teófilo Caldas, hateten iha proposta Orsamentu Jerál Estadu (OJE) 2023 ne’e SEAK prevee orsamentu millaun $1 resin, hodi implementa programa kultura no patrimóniu kulturál.
Nia hatutan, iha planu atividade anuál 2023 ne’e Sekretaria Estadu Arte no Kultura iha programa ida (1) sub-programa tolu (3) no atividade hitu (7).
“Programa mak kultura no patrimóniu ho ninia sub-programa desiminasaun no sensibilizasaun, patrimóniu tanjivel no intanjivel no seluk tan. Agora ami-nia orsamentu millaun $1-resin (1,2), maibé ida-ne’e sufisiente. Tanba, iha tinan 2023 nu’udar tinan politiku, entaun ita só tau orsamentu ne’e sukat ho ita-nia kapasidade no sukat ho tempu,” Teófilo Caldas hateten ba Agência Tatoli, hafoin halo audiénsia proposta OJE 2023 ho komisaun G, trata asuntu Edukasaun, Kultura, Juventude, Desportu no Sidadania iha Parlamentu Nasionál (PN), Díli, kinta ne’e.
Tuir nia, iha tinan polítika ne’e atividade politiku nian, ne’ebé ema sei partisipa iha kampaña no konsolidasaun, nune’e mós iha tinan 2023 ne’e sei iha eleisaun rua mak hanesan eleisaun parlamentár no eleisaun ba xefe suku sira.
“Entaun, ami-nia orsamentu ne’e ami kalkula katak ne’e sufisiente atu ami implementa planu atividade anuál ne’ebé sei implementa iha 2023,” nia esplika.
Iha tinan 2024, nia dehan, Governu foun mai tenke tau orsamentu tuir ida-ne’ebé Sekretaria Estadu Arte no Kultura halo no prepara hela, no Governu foun ne’e mós halo programa foun hodi tau orsamentu.
Entretantu, tuir livru anexu XI planu anuál ba servisu no entidade setór públiku administrativu, ba 2023 Sekretaria Estadu Arte no Kultura (SEAK) iha programa Kultura no Patrimóniu, ho sub-programa koordenasaun ba programa desiminasauan no promosaun arte no kultura iha Timor-Leste, ho nia atividade koordenasaun no jestaun ba programa arte no kultura.
Sub-programa arte no indústria kreativa kulturais, ho atividade promove arte no indústria kreativa kulturais iha Timor-Leste.
Atividade seluk, funsionamentu unidade implementasaun ba Akademia Arte no Indústria Kreativa no mós atividade promove apoiu ba atividade grupu kulturál.
Sub-programa patrimóniu kultura tanjivel no intajivel iha Timor-Leste, ho atividade promove asesu ba leitura no identifika artefaktu hodi konstitui biblioteka no muzeu nasionál iha futuru.
Nune’e mós atividade prezervasaun, konservasaun no promosaun ba patrimóniu kultura materiál no imateriál iha Timor-Leste no mós atividade levantamentu no públikasaun kona-ba patrimóniu kulturál iha Timor-Leste ho potensialidade hodi hetan rekuiñesimentu mundiál.
Jornalista : Nelia Fernandes
Editór : Cancio Ximenes
