DILI, 13 outubru 2022 (TATOLI)—Sekretaria Estadu Formasaun Profisionál no Empregu (SEFOPE) prevee $5.116.172 iha Orsamentu Jerál Estadu (OJE) 2023 ba prioridade haat.
“Ami propoin millaun $14 iha OJE 2023 maibé aseita de’it $5.116.172,” Sekretáriu Estadu Formasaun Profisionál no Empregu, Alarico do Rosário, hateten ba Agência Tatoli, iha rezidénsia Prezidente Parlamentu Nasionál, Farol, kuarta ne’e.
SEFOPE iha prioridade haat iha tinan 2023 hanesan desenvolvimentu rurál no urbana ho orsamentu $494.532, programa boa governasaun no jestaun institusionál $1.676.166, igualdade jéneru no inkluzaun sosiál $24.462, no programa investimentu no diversifikasaun ekonómika $2.921.012.
Notísia relevante: SEFOPE implementa planu asaun ho membru plataforma iha Baucau
Hosi atividade sia ho nia programa sira ko’alia kona-ba reforsa serbisu SEFOPE iha munisípiu sira ho orsamentu $494.532, boa governasaun $738.532, jestaun instituisionál $937.593, implementasaun NAP-GBV $24.462, estratejia nasionál empregu $55.896, informasaun nasionál kona-ba mão obra no merkadu $127.189, kria oportunidade ba empregu $1.583.189, sertifikasaun ba instituisaun sentru formasaun $973.899 no relasaun traballu $180.784.
“Hosi ita-nia sub-programa iha mós atividade hamutuk 29 mak ko’alia kona-ba koordena polítika empregu formasaun profisionál no promosaun relasaun traballu, inspesaun, fiskalizasaun no auditoria, apoiu jurídiku no seluk tan,” nia tenik.
Jornalista : Arminda Fonseca
Editora : Julia Chatarina
