Autoridade Baucau apoia materiál konstrusaun ba vítima dezastre naturál

BAUCAU, 14 outubru 2022 (TATOLI) – Autoridade Munisipál Baucau liuhosi Diresaun Serbisu Munisipál Protesaun Sivil no Dezastre Naturál Baucau, sesta ne’e apoia vítima uma-kain tolu ne’ebé estragu kauza dezastre naturál iha tinan 2022.

Diretór Serbisu Munisipál Protesaun Sivíl no Dezastre Naturál, Nelson Nunes, esplika, orsamentu refere mai hosi rekuperasaun anúal ne’ebé preve ba diresaun nune’e deside apoia ekipamentu konstrusaun no orsamentu mão de obra ba vítima uma-kain tolu atubele ajuda re-konstrui hikas uma ne’ebé hetan estragu.

“Ami apoia tuir kapasidade orsamentu ne’ebé preve ba vítima uma-kain tolu, enkuantu vítima seluk ami submete ba nasionál bele tau atensaun, munisípiu Baucau responde bazea ba orsamentu ne’ebé aloka mai diresaun ida-ne’e,” Diretór Serbisu Munisipál Protesaun Sivíl no Dezastre Naturál, Nelson Nunes hateten iha Vila Nova, sesta ne’e.

Vítima hirak-ne’e hanesan Romaldo Lobato, kategoriza estragu tótal hosi aldeia Cailiri, suku Gariuai, postu Baucau Vila. Nune’e Governu apoia materiál konstrusaun kalen-tahan 50, pregu dós-rua, martelu ida, metru ida, besi kotak 4×6 hamutuk 25, besik kotak medida 5×10 hamutuk 25, besi mili ualu hamutuk 30, besi mili 10 hamutuk sanulu no kanuru boot-kiik rua, balde neen, arrame ni sumentu saka 25 no orsamentu mão de obra rihun $1.

Kategória aat natoon vítima na’in-rua komposta hosi Aleixo da Costa hosi aldeia Lacoda, suku Seiçal no vítima Agostina Belo hosi aldeia Lacudala, suku Laculiu, postu administrativu Quelicai, hetan apoia kalen-tahan 50, parafuzu kalen kilograma rua, martelu ida, metru ida, besi kotak 4×6 hamutuk 25, besi kotak medida 5×10 hamutuk 25, no orsamentu mão de obra $750.

Hosi uma tolu ne’e vítima hosi suku Gariuai mak hetan estragu kauza hosi inséndiu. Enkuantu rua seluk hosi suku Seiçal no Laculiu kauza hosi anin sobu.

“La’ós kompensasaun tomak maibé sentimentu solidariedade ba komunidade sira-ne’ebé uma hetan estragu hodi hakmaan netik sofrementu iha tempu dezastre tuir klasifikasaun,” Nelson Nunes akresenta.

Parte Diresaun Protesaun Sivíl no Dezastre Naturál Baucau sei kontinua halo monitorizasaun nune’e serteza katak materiál konstrusaun no osan ne’ebé ajuda utiliza re-konstrusaun ba uma bazea akordu ne’ebé halo entre vítima no autoridade munisipál.

Notísia relevante: Protesaun Sivíl Baucau apoia emerjénsia ba vítima inséndiu iha Vemasse

Jornalista     : Natalino Belo

Editór            : Evaristo Soares Martins