BOBONARO, 13 outubru 2022 (TATOLI)-Vise Xefe Estadu Maiór FALINTIL-Forsa Defeza Timor-Leste (F-FDTL, Majór Jenerál Calisto dos Santos ‘Coliati’ husu ba Joven sira atu labele envolve iha organizasaun arte-marsiál hodi haluha fali eskola, tanba ukun-aan ne’e eroi sira sosa ho raan no ruin, tanba ne’e presiza jerasaun foun sira matenek atu dezenvolve rai ne’e.
Maijór Jenerál hato’o apelu ne’e bainhira partisipa serimónia inaugurasaun monumentu eroi pátria na’in-tolu iha aldeia Tuturema, suku Atudara, postu administrativu Cailaco, munisípiu Bobonaro, sesta ne’e.
Nia dehan, arte-marsiál hanesan ezersísiu fíziku ida atubele prepara-aan hanesan ema, maibé iha era independénsia ida-ne’e joven sira uza hatudu fali liman ba malu to’o oho malu iha fatin-fatin.
Notísia relevante: Lere Preokupa ho Movimentu Artes Marsiais
“Ha’u-nia mensajen ba ha’u-nia oan sira, alin sira, aproveita tempu ida-ne’e atu eskola, labele dedika imi nia-aan ba arte-marsiál, tanba arte-marsál la fó benefísiu ba ita-nia moris,” Coliati hateten.
Coliati akresenta Timor-Leste bele ukun-aan maibé sei labele moris hakmatek, tanba arte-marsiál hanesan virus ka moras ida-ne’ebé Indonézia sei rai hela, atu nune’e timoroan sira laoys ona haree malu hanesan maun ho alin, uma-mane no mane-foun, maibe haree malu hanesan inimigu.
Nia afirma, dezafiu ne’ebé país ida-ne’e sei hasoru maka kestaun seguransa iha futuru, ne’e duni ba oin joven sira la prepara-aan didiak Timor-Leste sei hasoru dezordennno moris iha ambiente ne’ebé laiha pás no establidade
Nia fó ezemplu, iha edifísiu estadu no privadu sira bainhira ema ruma atu ba serbisu mós tenke haree ba kór grupu organizasaun arte-marsiál idak-idak mak foin bele hetan oportunidade.
“Arte-marsiál ne’e kilat foun ida neokolonialista sira rai hela ba ita, atu nune’e ita moris tenke iha problema nia laran. Ita haluha ita nia-aan atubele kompete iha Timor-Leste ida-ne’ebé livre no independente atu nune’e ita kontinua sai atan nafatin,” nia hateten.
Nia fó hanoin ba joven sira katak dalan di’akliu no dalan loos mak eskola, la’ós arte-marsiál.
“Ha’u husu ba joven sira, tane Timor-Leste hanesan ita-nia eroi sira tane, fó sira-nia isin, fó sira-nia ruin ho raan mak sai ukun-aan,” nia afirma.
Notísia relevante: Deskonfia Pratika Treinu Arte Marsiál, Tribunal Aplika TIR Ba Joven Nain Ualu
Jornalista: Sérgio da Cruz
Editòr: Evaristo Soares Martins
