IGE, I.P falta kombustível difikulta halo movimentu hadi’a dalan Afaloikai-Bahatata
VIQUEQUE, 14 outubru 2022 (TATOLI)–Administradór postu Uatucarbau, munisípiu Viqueque, Alfredo dos Santos, hateten, Institutu Jestaun Ekipamentu, Institutu Públiku (IGE, I.P) daudaun ne’e falta kombustível nune’e seidauk konsege hadi’a dalan hosi suku Afaloikai liga ba suku Bahatata.
“Ekipamentu pezadu IGE, I.P oras-ne’e destaka ona iha área Bahatata, nune’e ha’u ba hasoru tékniku sira iha terrenu maibé sira dehan hasoru difikuldade ba orsamentu no kombustível. Tanba ne’e agora seidauk hadi’a dalan área rurál hosi Afaloikai liga ba Bahatata,” Administradór postu Uatucarbau, hateten ba Agência Tatoli, iha postu Uatucarbau, sesta ne’e.
Notísia relevante: Komunidade preokupa kondisaun estrada liga ba suku Bahatata
Administradór postu dehan, presiza tau-matan hadi’a estrada área rurál hodi fasilita komunidade nia movimentu.
“Ha’u haree dalan sira área rurál kuaze ho kondisaun a’at, ne’ebé foin lalais ha’u lori karta pedidu dala-rua ba IGE, I.P nasionál no ha’u ba hasoru tan ekipa téknika iha baliza Bagia nian, ha’u ba dirreta ko’alia ho sira, maibé sira mós hasoru problema mina. Ho ida-ne’e maka daudaun ne’e serbisu paradu,” nia akresenta.
Nune’e, nia sei esforsu halo konfirmasaun ba institutu hodi hadi’a dalan nune’e labele hamate povu nia atividade no movimentu sira.
“Ha’u sei esforsu nafatin halo konfirmasaun ho parte IGE, I.P hodi hadi’a dalan atu labele hamate povu nia atividade movimentu no povu bele lori sira-nia produtu ba merkadu. Ha’u haree bainhira fulan ne’e seidauk implementa, ha’u sei ba hasoru tan Prezidente IGE, I.P hodi aselera serbisu hadi’a dalan,” nia tenik.
Jornalista : Vitorino Lopes da Costa
Editora : Julia Chatarina
