MAKLN inaugura monumentu eroi pátria na’in-tolu iha Atudara

BOBONARO, 14 outubru 2022 (TATOLI)-Ministru ba Asuntu Kombatente Livertasaun Nasionál (MAKLN), Júlio da Conceição ‘Meta-Malik’, sesta ne’e inaugura monumentu eroi pátria nai’in-tolu iha knua Atulia-Lete, aldeia Tuturema, suku Atudara, postu administratrivu Cailaco, munisípiu Bobonaro.

Monumentu ne’e hetan bensaun hosi Padre Pároku Santa Cruz, Maliana, Valerio Gusmão ne’e harii ba saudozu na’in-tolu mak José Maria ‘Asukapir mate iha 01 dezembru 1975 nu’udar komandante kompañia, Benjamin da Costa Soares ‘Asuluri’ mate iha 10 maiu 1995 ho kargu komadante pelotaun, José Pou-Lelo, mate iha 12/04/1999 ho kargu hanesan Sekretáriu Nurep, suku Daudu.

Notísia relevante: http://Governu-Veteranu Bobonaro deside harii jardín eroi iha Manapa.

Biban ne’e Ministru Asuntu Kombatente Libertasaun Nasionál, Júlio da Conceição ‘Meta-Malik’, agradese no apresia ba família saudozu sira tanba bele serbisu hamutuk ho autoridade sira lori fila saudozu José Maria ‘Asukapir’ nia ruin ne’ebé ema oho soe iha muisípiu Aileu hodi mai hakoi iha kn’ua horik fatin.

Ne’e duni  governu apoia orsamentu  harii monumentu ba saudozu na’in-tolu ne’e ho objetivu atu dignifika no valoriza sira-nia sakrifísiu, maske hela de’it ruin no rai-metan, maibé sira kontribui duni ba luta libertasaun nasionál.

“Hau fó onra ba família sira tanba konsege realiza duni saudozu na’in-tolu ninia serimónia, ohin inaugura iha fatin ida-ne’e, parte ida dignifikasaun hosi parte estadu no governu halo ba sira, atubele hanesan mós sira seluk ne’ebé iha jardín eroi, maibé sira-ne’ebé família rasik halo halo hanesa ne’e governu tulun ba sira depois ita mai hamutuk ho sira, tanba família presiza ita-nia prezensa, atu sente katak estadu no governu dignifika duni sira-nia mate,” governante ne’e ko’alia iha Cailaco.

Maske nune’e governante husu ba família sira katak fatin ne’e prontu ona, ba oin tenke prezerva no kuida nafatin atu nune’e bele sai fatin sagradu.

“Fatin ne’e tenke jerasaun ba jerasaun pelumenus bele hakat, bele asiste katak, afinál fatin oan ida ne’e, aldeia ida-ne’e, suku ida-ne’e ema hanesan mós mate ba rai ida-ne’e maka ita ukun-an,” nia akresenta.

Vise Xefe Estadu FALINTIL- Forsa Defeza Timor-Leste, Májor Jenerál Calisto dos Santos ‘Coliati’ konsidera monumentu ne’e importante tebes tanba saudozu na’in-tolu sai hanesan eroi boot hosi jerasaun  ba jerasaun.

“Ita-nia eroi sira rai hela istoria mai ita, saoe hela isin, fakar-raan ba rai Timor-Leste, agora oinsá mak ita bele aproveita Timor-Leste ne’ebé independente, nu’udar ita- nia aman, avo sira hari hela uma-kain no uma-lisan ida-ne’e ba ita, oinsá oan sira atu prezerva uma ida-ne’e,” nia hateten.

Sekretáriu autoridade munisípiu Bobonaro, Joao Fátima do Carmo, dehan, istória sira hanesan ne’e, autoridade munisípiu mós iha planu atu harii, maibé laiha kbiit tanba kompeténsia ne’ebé governu sentrál atribui natoon de’it nune’e labele responde família saudozu sira-nia preokupasaun.

“Ha’u agardesu ba família saudozu komandante na’in-tolu ne’ebé mak iha inisitiva di’ak hodi harii monumentu ida-ne’e, ba future bele sai istória ba ukun rasik-aan, liuliu ba ami sira jerasaun foun, monumentu ida-ne’e mós sai hanesan fatin turizmu iha munisípiu Bobonaro,” Joâo dehan.

Prezidente Komisaun Organizadora atuál administradór postu administrativu Cailaco, Alfredo Meta-Dau, agradese ba governu, maske iha limitasaun tempu tanba serbisu barak maibé bele fahe tempu hodi mai partisipa iha serimónia importante ida-ne’e.

Alfredo subliña, monumentu ne’e hahú konstrui ida loron 2 fevereiru to’o ohin halo inaugurasaun, tanba família uma-lisan ‘Mambu’ halibur osan no hetan apoia mos hosi governu totál hamutuk rihun $9.

“Ida-ne’e atu hatudu katak, istória mai hosi individu idak-idak, mai husi fámilia, uma-lisan apoiu malu ba to’o istoria koletiva, atu hetan hetan istória ida primeiru mai hosi família rasik, tanba estadu fó apoiu de’it, maibé atu inísia no konstrui ne’e mai hosi família rasik, ne’e duni ha’u husu Cailaco-oan sira atu hahu hatuur ona ita-nia istoria,” nia katak.

Notísia relevante: SEAKLN enkoraja veteranu nia oan iha Bobonaro kontinua eskola

Jornalista: Sérgio da Cruz

Editór: Evasristo Soares Martins