BOBONARO, 11 outubru 2022 (TATOLI) — Sekretáriu Estadu Asuntu Kombatente Libertasaun Nasionál, Júlio da Conceição ‘Loro Mesak’ ezije vetaranu nia oan sira iha munisípiu Bobonaro, atu kontinua eskola nune’e bele konstribui kapasidade iha prosesu dezenvolvimentu nasionál.
Sekretáriu Estadu ba Asuntu Kombatente ko’alia asuntu ne’e iha ámbitu serimónia enseramentu verifikasaun dadus kombatente libertasaun nasionál ne’ebé rejistadu dezde 2009 iha suku Ritabou, postu administrativu Maliana, ne’ebé reprezenta munisípiu Bobonaro, tersa ne’e.
Notísia relevante: Loro Mesak: veteranu nia-oan la eskola, ema seluk sei ukun imi
Nia hato’o apelu ne’e tanba foin lalais Ministériu ba Asuntu Kombatente Libertasaun Nasionál (MAKLN) loke vaga bolsa estudu kada munisípiu ema na’in-100 maibé barak mak la prienxe formuláriu, maske taka ona avizu iha públiku kobre munisípiu hotu.
Ne’e duni, Júlio dehan, Governu kontinua prioritize veteranu no mártir nia-oan atu asesu edukasaun atubele kontinua luta ba dezenvolvimentu nune’e hatutan no valoriza inan-aman sira- nia sakrifísiu no dedikasaun luta ba ukun rasik-aan.
“Aban bainrua imi mate tiha, sé mak atu ukun-rai ida-ne’e, se veteranu nia-oan lakohi eskola, agora aproveita ami ne’ebé sei iha oin, imi tenke ba eskola, tanba aban-bainrua veteranu sira mate hotu ona, ema sira-ne’ebé atu ukun nasaun presiza ema matenek,” nia fó hanoin.
Nia akresenta, bainhira veteranu sira nia-oan laiha kbiit, maibé iha vontade no interese hakarak kontinua estuda bele hakbesik ba konsellu veteranu iha munisípiu atubele fasilita hodi hetan oportunidade.
“Ha’u eskola hotu ona, dia 30 agora ha’u gradua, eskola atu sadik ita-boot sira-nia oan sira, dehan nusá mak ema-boot sira eskola, ita labele. Ne’ebé haruka sira ba eskola tanba futuru rai ida-ne’e iha ita-boot sira-nia oan nia liman,” nia katak.
Ministru Ensinu Superiór, Siénsia no Kultura, Longuinhos dos Santós, reforsa hodi haktuir liafuan hosi Primeiru Ministru, Taur Matan Ruak, katak, veteran sira-nia luta seidauk remata iha era uku-rasin aan.
“Tusan ne’e ita lori maka ita tenke kria pás no dezenvolvimentu. Ho ida-ne’e veteranu nia-oan presiza eskola, atu dezenvolve rai ida-ne’e veteranu nia-oan mós tenke eskola, tanba ministériu ensinu superiór kria ona tipu bolsa estudu tolu,” nia relata.
Tipu oportunidade dahuluk mak MSSK serbisu hamutuk ho Konsellu Kombatente Libertasaun Nasionál aplika rejime espesiál ba veteranu sira-nia oan ba eskola iha Universidade Nasionál Timor Lorosa’e (UNTL) no Institutu Politékniku Betano (IPB) ne’ebé kada tinan rekruta ema na’in-600 kompostu hosi munisípiu ida na’in-50.
Nune’e mós tipu bolsa estudu ida maka fó subsídiu ba veteranu sira-nia oan ne’ebé estudu iha nível universitáriu atu finaliza teze monografia atubele hasai títulu lisensiatura.
“Ha’u hakarak veteranu oan sai hanesan ne’e ezemplu mak Seketáriu Estadu Asuntu Kombatente mós hetan ona subsídiu ida-ne’e sai lisensiatura atubele sai rekursu umanu potensiál Timor-Leste nian,” nia subliña.
Notísia relevante:MACLN aprova programa bolsa estudu ba veteranu nia oan hamutuk 839
Iha parte seluk, Sekretáriu Estádu Asuntu Kombatentes Livertásaun Nasionál (SEAKLN), Júlio da Conceição ‘Loro Mesak’ hateten iha mandatu VIII Governu Konstitusionál, membru sira bele mai hosi partidu ketak ketak maibé veteranu ne’e nafatin ida de’it atu hamutuk dezenvolve Timor-Leste.
“Iha fatin hotu, ha’u sempre hatete katak partidu bele ketak-ketak, maibé veteranu ne’e ida de’it, tanba uluk ami funu iha ai-laran, imi lori hahaan ba ami la haree ba partidu, ukun-aan tiha ami mak ba tuur fali, ne’e imi-nia ema maka ne’e,” nia hateten.
Jornalista : Sérgio da Cruz
Editór : Evaristo Soares Martins
