AINARO, 14 outubru 2022 (TATOLI)–Deputadu Partidu Congresso Nacional de Reconstrução Timorense (CNRT), Patrocínio dos Reis Fernandes, hateten polítika kombate hoax hanesan preukupasaun Estadu tomak nian, tanba hoax bele sai ameasa ba Estadu no sosiedade tomak.
Notísia Relevante: Teófilo: “SEAK promove ‘tara bandu’ kombate ‘hoax’ iha Timor-Leste”
“Prezensa Deputadu sira-nia iha ne’e atu hatudu de’it katak polítika atu kombate hoax ne’e preukupasaun Estadu tomak nian, tanba hoax ne’e bele sai ameasa ba Estadu no sosiedade tomak no bele kebra ita-nia valór sosiedade nomós bele kebra valór sira hotu ne’ebé atu konstrui ita-nia Estadu ne’e sai Estadu ida-ne’ebé sibilizadu no modern. Hoax ne’e mós bele sai ameasa ba buat sira ne’e, tanba ne’e importante ba ita hotu nia partisipasaun hodi bele fahe informasaun ba malu,” Patrocínio dos Reis Fernandes hateten liuhosi nia diskursu iha kampaña nasionál kombate hoax no promove internet saudavél liuhosi “Sensibilizasaun Literasia Dijitál” ba estudante sekundária iha eskola Católika Santo Inácio de Loiola, Maubisse Villa, sesta ne’e.
Tuir nia, identifikasaun ida-ne’e tanbasá hili kampaña kombate hoax identifika lalais ba grupu sira-ne’ebé utiliza telemovel tanba liga ho telemovel no internet. Telemovel mak meiu no instrumentu ida-ne’ebé lori ba-mai de’it, segundu ka minutu nia laran bele espalla kedas informasaun ba Timor laran tomak no mundu asesu.
“Tanba ne’e, ha’u haree identifika grupu sira-ne’ebé poténsia boot tebes ba utiliza telemovel hodi halo hanesan grupu alvu. Primeiru ba kampaña ida-ne’e pozitivu tebes, tanba uluk ita sei iha tempu konvesionál nian, ema halo hela gosip iha Ainaro no Maubisse tinan tomak gosip ne’e dala ruma bele la to’o iha Dili no ema ruma halo hela provokasaun ruma iha Dili karik, lori tempu naruk dala ruma ita iha Ainaro no Maubisse mós la rona. Maibé ohin loron, lori de’it segundu ka minutu ida buat ruma akontese iha Dili, Timor laran tomak no mundu bele akompaña liuhosi meiu interne, ne’ebé utiliza ninia instrumentu telemovel,” nia dehan.
Tanba ne’e, nia dehan ba estudante no joven sira atu utiliza internet liuhosi telemovel ba buat ne’ebé di’ak ba futuru.
“Uluk, ami-nia tempu kuandu eskola sira laiha bibleoteka ami preokupa loos, tenke ba lee livru sira iha biblioteka ka buat hotu, maibé ohin loron bibleoteka laiha fatin ona. Atu eskola sira ezije katak tenke iha bibleoteka tanba biblioteka iha hela google ona. Hosi ne’e, estudante sira iha hotu ona telemovél, tama ba iha google hakarak lee livru saida, autór ne’e sé, nia pajina hira, nia hakarak saida, atu asesu ba lei hira Parlamentu Nasionál aprova ona no lei kona-ba saida, ida ne’e tama hotu iha ne’ebá. Maibé, agora hein de’it mak ita mak atu utiliza oinsá no utiliza ho responsabilidade,” nia dehan.
Jornalista : Nelia Fernandes
Editór : Cancio Ximenes
