RAEOA-NTT hahú diskute harii investimentu iha área turizmu

MANGGARAI 14 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano hamutuk ho inisiadór Zona Ekonomia Sosiál Merkadu Timor-Leste (ZEESM-TL), Mari Alkatiri hahú  halo diskusaun ho Governadór Nusa Tenggara Timur (NTT), Vitór Laiskodat, kona-bá futuru atu harii investimentu iha área turizmu nian.

Deskusaun ne’e hanesan faze dahuluk, no hetan akompaña hosi Embaixadór Timor-Leste ba Indonzia, Filomeno Aleixo, realiza iha distritu Manggarai, Barat provínsia NTT. Hafoin remata delegasaun hosi Timor-Leste ho NTT kontinua kedas hala’o vizita direita ba fatin turizmu sira-ne’ebé eziste iha distritu ne’e rasik.

Jornalista Agência Tatoli, observa durante atividade vizita ofisiál ne’e, lidera direita hosi Governadór NTT, Vitór Laiskodat, ne’ebé hahú hosi portu Water-Front Marina Labuan Bajo to’o illa Rinca durante loron ida.

Prezidente Autoridade RAEOA, Arsénio Paixão Bano, informa, nia prezensa iha distritu Manggarai Barat, fatin turizmu Labuan Bajo, hodi realiza deskusaun ofisiál ho Governadór NTT tanba iha ideia boot ida entre Indonézia ho Timor-Leste espesiál ba Oé-Cusse no NTT atu halo iha Oé-Cusse.

“Ita mai haree ezemplu, fatin ne’e investimentu maka’as tebes ba área turizmu, entaun ita haree no halo diskusaun hanesan faze dahuluk ba futuru ita bele mós halo iha Oé-Cusse,” Arsénio Paixão Bano, informa ba Agência Tatoli, iha distritu Manggarai Barat, sesta ne’e.

Prezidente Autoridade RAEOA nia haree katak, importante Oé-Cusse la’o nafatin ba oin, fó serbisu no rendimentu ba ema joven sira no ema hotu, entaun inisiativa sira-ne’e tenke haree no tetu, hodi hein negosiasaun Governu Sentrál ho Jakarta rezultadu ne’e oinsa kona-bá zona franka ne’ebé sei estabelese entre Indonézia ho iha área fronteira sira, liuliu zona ekonómia Oé-Cusse.

Governadór NTT, Vitór Laiskodat, konsidera vizita importante tebes.

“Ha’u haree katak iha situasaun ne’e, rantu Timor Osidentál nomoos Timor-Leste tenke foti desizaun ho ativu, hodi dezenvolve illa ne’ebé di’ak liu. Iha vizita ne’e ha’u kontente tebes tanba diskute asuntu ne’ebé la’ós bainbain, entre Timor Osidentál no Timor-Leste, ita iha kapasidade bodi dezenvolve illa ne’e sai nabilan,” nia katak.

Nia dehan, asuntu ne’e sei kontinua halo diskusaun hosi Prezidente Repúblika Timor-Lestebno Indonézia, molok avansa ba implementasaun.

Inisiádór ZEESM-TL, Mari Alkatiri, informa, diskusaun ne’e ko’alia kleur ona tanba governadór vizita dala-rua ba RAEOA.

“Ami ko’alia atu halo kooperasaun entre Oé-Cusse ho NTT, Oé-Cusse atu reprezenta interese Timor-Leste nian, maibé prontu, importante tanba iha Oé-Cusse iha ninia programa rasik, tanba Oé-Cusse sai sentru ida, atu reprezenta Timor-Leste iha relasaun ekonómika komersiál entre Timor-Leste ho zona orientál Indonézia nian inklui NTT,”. Mari Alkatiri hatete.

Inisiádor ZEESM ne’e informa, iha mumentu seremónia tomada pose Prezidente Repúblika, José Ramos Horta, Governadór NTT realiza enkontru ho espesiál kona-bá investimentu área turizmu iha Oé-Cusse.

“Ha’u agora koordenadór plaforma VIII Governu, maibé ha’u la ukun maibé importante presiza trata uluk Governu Sentrá Díli ho Jakarta, depois realiza programa ne’e, tanba programa ne’e la mai atu hamate fali programa ida Oé-Cusse nian ba longu prazu, sai laboratóriu no sai referénsia ba Timor-Leste, maibé ha’u hanoin iha fatin atu akomoda,” nia katak.

Tuir Alkatiri nia haree, distritu Manggarai Barak, iha investimentu potensialidade iha parténsia Flores nian, potensialidade ba kooperasaun ne’e to’o ne’ebé, tanba Flores agora tama ona iha dezenvolvimentu aseleradu tebes, liuliu iha área turizmu no komersiál.

“Tan ne’e maka ami ko’alia mós proposta daudaun la’o hela entre Governu rua ne’e, atu halo inisiativa ekonomia konjunta ida, entre Oé-Cusse Timor Osidentál, maibé sei Governu husu ha’u-nia opiniaun, ha’u sei kontribui, sei la husu, prontu, idak-daik deside ha’u mós lakoi interfere.

Notísia relevante: PA RAEOA-MEKAE diskute atu estabelese zona franka haforsa polítika ZEESM

Jornalista: Abílio Elo Nini
Editór: Cancio Ximenes