Top

SEAK nafatin fó espasu ba soru-na’in prodús tais modernu

Fundasaun Alola organiza atividade ba inan-feton sira soru tais tradisionál, segunda (30/5/2022). Imajen Tatoli/Antóonio Daciparu

DILI, 14 outubru 2022 (TATOLI)–Diretór Jerál Arte no Kultura iha Sekretáriu Estadu Arte no Kultura (SEAK), Manuel Ximenes Smith, hateten SEAK nafatin fó espasu ba soru-na’in sira hodi prodús tais uza kabas atu prodús tais modernu hodi kompete iha merkadória.

Notísia Relevante: SEAK: soru tais sei kahor ho kabas modernu no kabas tradisionál

“Aleinde ita proteje tais orijinál no ita mós loke espasu ba soru-na’in sira atu buka sira-nia moris liuhosi prosesu tais modernu,” Manuel Smith hateten iha konferénsia imprensa, iha komemorasaun loron nasionál kultura ba dala-VIII ho tema “Ita promove, prezerva no valoriza identidade kulturál hodi hametin pás no estabilidade no kontribui ba prosesu dezenvolviementu nasionál”, iha SEAK, Avenida Portugál (anterior Praia dos Coqueiros), Dili, sesta ne’e.

Tuir nia, tais nu’udar ezisténsia ne’ebé mak lori hosi ema moris mai no festeza moris nian to’o lori ema ba mate, entaun tais ne’e nu’udar prioridade boot ba komunidade tomak iha Timor-Leste.

“Ezistensia tais ne’e rasik fó valór ba kulturál barak ba ema timoroan,” nia dehan.

Atu kontinua salva guarda tais nia orijin, nia dehan, Governu liuhosi SEAK servisu hamutuk ho parseiru Fundasaun Alola hodi fó ona formasaun soru tais ba komunidade iha Liquiça kona-ba kór tais nian.

“Ita fó ona foramasaun liuhosi salva guarda urjente ba diversifika tais hosi munisípiu balun, mak iha semana kotuk ha’u ba abertura hela ba formasaun iha munisípiu Liquiça, ne’ebé mak ita-nia parseiru dezenvovilmentu Fundasaun Alola fó formasaun kór tradisionál ba tais,” nia dehan.

Maibé sei la taka dalan ba soru-na’in ne’ebé mak prodús hodi nesesista ba nia nesesidade loron-loron nian, entaun presiza mistura ho kabas modernu nune’e bele atrai ema atu sosa.

“Ita nafatin prezerva, promove no salva guarda ita-nia tais orijin no maihosi duni kabas beila ka uluk nian,” nia dehan.

Atu tais orijin labele lakon iha Timor-Leste, Vise Prezidente Komisaun G ne’ebé trata asuntu edukasaun, juventude, kultura no sidadania, Josefa Pereira Soares, hateten Governu presiza hasa’e produsaun algodaun soru tais nian iha Timor-Leste, nune’e soru-na’in sira bele soru tais ho kualidade.

“Presiza produsaun algodaun. Prodús kabas ne’e enkuantidade, labele ema ida de’it nia kuda nia toos laran hun ida no rua, ita dehan ida-ne’e mak loos ona. Maibé, oinsá mak ita bele prodús enkuantidade atu alguodaun ne’e ita uza atu fabrika it-nia tais. Se ita hakarak buat ida-ne’e atu sai hanesan ba komersionaliza ita-nia tais, dahuluk mak produsaun algodaun enkuantidade, hanoin ida-ne’e Ministru Turizmu Komérsiu no Indústria tenke servisu hamutuk ho Ministériu Agrikultura atu bele prodús no diversifika nafatin produsaun kabas ne’e iha populasaun nia klaran, hanesan iha agrikultura sira-nia liman. Tanba ida-ne’e bele lori mós osan ba iha agrikultór sira,” nia dehan.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!