DILI, 14 outubru 2022 (TATOLI)–Embaixada Repúblika Indonézia iha Timor-Leste, fó sai katak universidade 23 iha Indonézia, tinan ne’e prontu oferese programa bolsa estudu ba timor-oan 200, iha ámbitu tinan-20 relasaun bilaterál entre país rua.
Embaixadór Repúblika Indonézia iha Timor-Leste, Okto Dorinus Manik, hateten, daudaun ne’e universidade públiku no privadu hamutuk 23 loke ona prosesu inskrisaun ba estudante timor-oan sira ne’ebé interese hakarak hetan bolsa estudu hodi kontinua estudu iha Indonézia.
“Atividade inskrisaun ita sei loke hahú ohin iha Timor Plaza hosi sesta to’o sábadu, iha domingu 16 outubru 2022 ita sei loke filafali iha Pusat Budaya Indonézia, iha Maskarinhas. Ita fiar katak estudante timor-oan sira bele hetan informasaun detallu liuhosi programa sira ne’ebé oferese hosi universidade Indonézia ne’e rasik,” Embaixadór hateten iha ninia diskursu, ne’ebé hala’o iha Timor Plaza, sesta ne’e.
Bolsa estudu ne’ebé oferese ba kandidatu bolseiru, ne’ebé la’o tuir mekanizmu no kritériu kada universidade, ho modelu la hanesan.
Notísia relevante: Kandidatu bolsa estudu na’in-25 hahú teste saúde-fíziku bá POLTEKBANG Surabaya
Tuir nia, durante ne’e iha universidade Indonézia balun maka mai hasoru direita Embaixada hodi ko’alia kona-ba programa bolsa estudu, maibé agora liuhosi oportunidade hanesan feira edukasaun ne’e, Embaixada iha planu halibur universidade sira tau hamutuk iha fatin ida de’it maka hasoru direita ho estudante timor-oan sira.
“Ami hein katak programa bolsa estudu ne’e bele hetan aproveitamentu di’ak hosi estudante sira. Ami-nia dezeju alin sira iha Timór bele hetan oportunidade hodi kontinua estudu iha Indonézia tanba ha’u haree maioria estudante timor-oan barak ne’ebé antes ne’e eskola iha Indonézia, asume pasta iha Estadu no Governu nia laran, ne’e orgullu boot tebes,” nia akresenta.
Relasaun bilaterál entre país rua lori ona benefísiu boot ba parte rua, liu-liu hosi kooperasaun hodi hadi’a rekursu umanu liuhosi programa sira ne’ebé realiza iha Pusat Budaya Indonézia iha Timor-Leste.
“Relasaun bilaterál ne’e akontese liuhosi maneira edukasaun lubuk ida hanesan estudu komparativu, formasaun no treinamentu siénsia no teknolojia ba linguístiku inklui kulturál to’o oferese bolsa estudu ba estudante iha Timor-Leste,” nia tenik.
Nune’e, liuhosi kooperasaun hamutuk kona-ba edukasaun ne’e rasik, parte rua iha esperansa boot katak bele ajuda hasa’e di’ak liután relasaun bilaterál no unidade entre Indonézia no Timor-Leste.
Iha fatin hanesan, Adidu Edukasaun Indonézia, Ikhfan Haris, hateten, feira edukasaun hanesan pasu ida atu halo promosaun no fahe informasaun kona-ba atividade sistema ensinu aprendizajen iha universidade 23 durante loron-tolu ba kandidatu estudante timor-oan ne’ebé hakarak ba eskola iha Indonézia.
“Tinan ne’e sei oferese bolsa estudu 180 to’o 200 hosi universidade iha indonézia ba alin, kolega no estudante feto no mane sira hosi Timor-Leste, tanba Indonézia presiza tebes universitáriu sira hosi nasaun seluk, espesiál ida maka ami-nia nasaun favóritu Timor-Leste tanba laiha diferensa ida kona-ba relasaun sosiál kultura no ekonomia,” nia dehan.
Nune’e mós, Ministru Ensinu Superiór Siénsia no Kultura (MESSK), Longuinhos dos Santos, relata katak daudaun ne’e Ministériu Negósiu Estranjeiru no Kooperasaun (MNEK) prepara hela memorandu entendimentu entre país rua ho objetivu atu fasilita estudante bele ba estuda iha Indonézia.
“Tanba ne’e ha’u fó apoiu ba atividade sira hanesan ne’e tanba importante tebes atubele hasa’e liután kualidade edukasaun ba jerasaun foun Timor-Leste. Feira sira hanesan ne’e iha vantajen boot tanba bele halo peromosaun ba valór edukasaun no kulturál bele fó koñesimentu liután kon-ba instuituisaun ensinu superiór iha Indonézia ho formál atu povu no estudante timor-oan sira ne’ebé hakarak kontinua estudu bele iha ona bukae,” nia tenik.
Universidade 23 publiku no privadu iha Indonézia ne’ebé prontu ona atu apoiu programa bolsa estudu ba estudante timor-oan iha tinan ida ne’e mak hanesan Universidade Brawijaya Malang, STIE YKPN Yogyakarta, Universidade Kristen Satya Wacana Salatiga, Universidade Airlangga Surabaya, President University, Universidade 17 Agustus 1945 Jakarta, Universidade Aisyiyah Yogyakarta, Institutu Teknolojia Bandung, Universidade Islam Internasionál Indonesia, Universidade Dian Nuswantoro Semarang, Sekolah Tinggi Pariwisata Trisakti Jakarta, Universidade Katolik Widya Mandira Kupang, Telkom University Bandung, Universidade Atma Jaya Jakarta, Universidade Negeri Surabaya, Universidade Nusa Cendana Kupang, Universidade Negeri Padang, Universidade Padjajaran, Universidade Hasanuddin Makassar, Universidade Wijaya Kusuma Surabaya, Universidade Pertahanan, Universidade Gadjah Mada, no Universidade Hang Tuah Surabaya.
Feira ne’e ofisialmente loke hosi Ministru Longuinhos dos Santos, akompaña hosi Embaixadór Repúblika Indonézia iha Timor-Leste, Okto Dorinus Manik, Adidu Edukasaun Indonézia, Ikhfan Haris no Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis.
Jornalista : Tomé Amado
Editora : Julia Chatarina
