Borja da Costa nia obra poétika inspira jerasaun foun
DILI, 17 outubru 2022 (TATOLI) – Poeta, linguísta inklui Foinsa’e Timoroan sira konsidera obra poétika Francisco Borja da Costa sai hanesan ‘Matadalan Poétiku no Matadalan Jornalístiku’ ba jerasaun foun sira atu banati tuir.
Nune’e, hodi fó onra ba éroi nasionál Francisco Borja da Costa, Poeta brillante Timoroan, ne’ebé hakerek Ino Nasionál ‘Pátria, Pátria’, Grupu Juventude Evergreen Study Club (ESC), MSB Study Club, hamutuk ho Sentru Max Stahl selebra loron moris Borja da Costa ba dala-76 iha Sentru Max Stahl Dili, sábadu foin lalais.
Fundadór ESC no MSB, Abe Barreto hateten, obra Borja da Costa fanun pasiénsia, konsiénsia, konsisténsia, no reziliénsia Timoroan sira nian.
“Nia ema vizionáriu ida ne’ebé mak hanoin do’ok. Ho idade ida ne’ebé mak ki’ik, nia produz obra ne’ebe mak espetakulár. Ida ne’e inkrível. Ba ha’u, nia nu’udar lia-na’in modernu tanba nia kombina buat rua hamtuk -Linguístiku no Jornalístiku’ hamutuk. Ida ne’e buat ida ne’ebé mak joven sira tenke banati tuir,” Poeta timoroan Barreto rekoñese.
Línguista no Poeta, Abe Barreto énfaze: “Ha’u bele dehan katak, ha’u ne’e ‘Pengikut setia matadalan Borja”.
Notísia relevante: Abe Barreto: “Mundu poezia hanesan ha’u-nia lalatak rasik”
Iha fatin hanesan, Diretor Ezekutivu, nu’udar mós Jornalista husi Sentru Max Stahl, Edi Pinto, hateten Borja da Costa nia liafuan sira sempre fó esperansa.
“Bainhira ha’u rona ema le’e Borja da Costa ninia poezia sira, ha’u sente hanesan Espiritu foun ida mosu ba ha’u. Entaun, ha’u konsidera ninia obra motiva ita-nia joven sira atu banati tuir,” Pinto hateten ba TATOLI iha Sentru Max Stahl Dili.
Nune’e mós iha oportunidade ne’e, Sobrevivente Masakre Santa Cruz, Rai Mor fó ninia hakruk ba Éroi Borja da Costa liu husi lee ninia poezia ho títulu ‘Nonok’.
“Borja inspira ha’u hakerek poezia liu-liu kona-ba reflesaun sira. Borja ninia obra ne’e fanu nasionalizmu no patriotizmu iha joven sira atu kuda domin iha ita-nia fuan ba ita rain,” Rai Mor haktuir.
Tuirmai, Julito Magno, membru ida husi grupu MSB hateten: “Borja hanorin ba ita, maske ki’ak iha materiál, maibé labele ki’ak iha intelektuál”.
Entretantu, komemorasaun loron Borja da Costa nian komesa ho sunu lilin, lee poezia no diskusaun kona-ba obra espetakulár Borja da Costa.
Francisco Borja da Costa moris iha 14 outubru 1946, no mate ho idade 29, iha 8 dezembru 1975, loron ida hafoin invazaun Indonézia iha Timor-Leste. Kauza ba ni-nia mate, hetan oho husi militár Indonézia.
Borja konsidera nu’udar poeta brillante no jéniu Timoroan ne’ebé mak hakerek ino nasionál “Pátria, Pátria” inklui obra koñesidu seluk hanesan poezia ho títulu “Um Minuto de Silêncio.”
Notísia relevante:Borja da Costa nia obra kontribui ba luta libertasaun nasionál
Jornalista: Filomeno Martins
Editór : Rafy Belo
