DILI, 17 outubru 2022 (TATOLI)–Ministru Edukasaun Juventude no Desportu (MEJD), Armindo Maia, kontinua halo esforsu atu hetan desizaun pozitivu hosi Konsellu Ministru (KM) konaba destinu profesór kontratadu 4.902 ne’ebé submete ona dezde jullu 2022.
Ministru Armindo Maia hateten, nia haruka ona proposta ba KM atu uza kompeténsia buka solusaun ruma rezolve destinu profesór kontratadu sira nian.
“Ami hakarak iha fulan-outubru ne’e konsellu ministru bele deside ona buat ruma konaba destinu profesór 4.902 nian, nune’e antes tinan ne’e remata ami hakarak profesór voluntáriu no kontratadu ninia problema bele rezolve ona”, Armindo Maia hateten ba jornalista sira liuhosi konferénsia imprensa ne’ebé hala’o iha salaun enkontru MEJD Vila Verde, segunda ne’e.
Ministru hatutan karta ofisiál ne’ebé MEJD haruka ba KM ne’e dezde fulan-jullu maibé tuir informasaun katak iha ona paresér pozitivu hosi ministériu balun, tanba ne’e ministériu edukasaun hakarak dudu lalais prosesu ne’e atu profesór kontratadu sira bele rezolve lalais sira nia futuru iha tempu badak.
Notísia relevante: MEJD kontinua halo esforsu ba estatutu profesór kontratadu
Jornalista : Tomé Amado
Editora : Rita Almeida
