DILI, 17 outubru 2022 (TATOLI) — TradeInvest Timor-Leste no Servisu Rejistrasaun no Verifikasaun Emprezariál (SERVE,I.P), segunda ne’e, aprezenta progresu servisu ba Prezidente Repúblika, José Ramos Horta.
Diretór Ezekutiva TradeInvest, Arcanjo da Silva, hateten objetivu sira hasoru Xefe Estadu ne’e tanba Prezidente Repúblika hakarak hatene SERVE,I.P no TradaInvest nia servisu ba fasilita dezenvolvimentu ekonómia nasaun nian liuhosi setór privadu ne’ebé aposta ba emprezáriu nasionál no internasionál ne’ebé bolu investidór doméstika no investidór estranjeiru sira.
“Liuhosi ita-nia hasoru malu ne’e PR haruka ita tenke presta atendimentu ne’ebé di’ak liu atu bele atrai investór sira mai tanba atrasaun investimentu ne’e luta ka kompetisaun ida atu investidór sira iha rejiaun ne’ebé investe iha Timór no investidór sira iha mundu bele mai investe iha Timór”, Arcanjo da Silva, hateten, iha Palásiu Prezidensiál Bairru-Pite, ohin.
Nia dehan, iha enkontru husu ba PR ne’ebé mak iha kompetisaun investidór sira atu mai investe iha Timór presiza tau atensaun makaas ba reforma no armonizasaun iha instrumentu legál sira no tenke iha kapasidade tékniku no étika di’ak hodi atende investidór sira.
Diretór afirma investidór ne’ebé Estadu sertifika desde 2005 estabelisimentu TradeInveste Timor-Leste to’o agora sertifika ka fó deklarasaun benefísiu asina akordu espesiál investimentu kategória tolu hamutuk 298 investidór.
“Ida ne’e ita sura hamutuk ona investidór nasionál no internasionál, ida ne’e hola parte ba progresu servisu TradeInvest nian”, nia hateten.
Diretór Ezekutivu SERVE,I.P, Florêncio da Costa Shances, hateten SERVE,I.P nia prezensa hamutuk ho TradeInvest ba hasoru Prezidente Repúblika tanba instituisaun rua ne’e bele apoiu dezenvolve ekonómia iha rai-laran.
“Iha ita-nia enkontru ne’e PR dehan presiza armoniza lejislasaun Timor-Leste tanba armonizasaun lei ne’e importante tebes atu bele dezenvolve ekonómia nasaun ida ne’e”, nia dehan.
Aleinde ne’e, PR mós husu SERVE,I.P halo servisu dizitalizasaun, ida ne’e importante tanba ohin loron servisu hotuhotu iha teritóriu tomak sei halo ho surat-tahan ne’ebé nasaun balu la eziste ona.
“Buat hotu la’o dizitalizasaun ita bele kria lei foun halo revizaun, armoniza no ita bele kria kampu traballu, atu nune’e kada individu ida bele hetan benefísiu” nia hateten.
Nune’e, Prezidente Repúblika rasik sei haruka asesór sira fó apoiu tékniku ba institutu TradeInvest no SERVE,I.P atu haree ba servisu sira hanesan lei no seluk tan bele asela lalais.
Jornalista : Arminda Fonseca
Editór : Zezito Silba
