VIQUEQUE, 18 outubru 2022 (TATOLI)- Sekretáriu Estadu Juventude no Desportu (SEJD), Abrão Saldanha, husu ba joven sira ne’ebé involve iha konfrontu Bikarin, postu administrativu Viqueque Vila, munisípiu Viqueque atu kolabora ho parte autoridade seguransa hodi lori prosesu ba justisa.
“Ha’u husu joven sira ne’ebé involve konfrontu foin lalais iha Bikarin, presiza kolabora ho parte seguransa hodi lori prosesu ne’e ba tribunál. Tanba investigasaun maka bele hatene lolos kauza mai hosi arte marsiais ka hosi parte seluk maka lansa fali rumoris ba arte marsiais. Tanba, ohin ha’u rona informasaun hosi parte komandu PNTL Viqueque katak sira iha informasaun prelimináriu akontesementu konfrontu Bikarin seidauk iha konkluzaun,” Abrão Saldanha hateten ba jornalista Agência Tatoli, iha Kampo futeból munisípiu Viqueque, tersa ne’e.
Ho nune’e Governante ne’e apela, ba líder arte marsiais sira atu kolabora no hakalma membru sira hodi labele halo provokasaun ba rumoris hotu ne’ebé akontese no entrega ba sistema justisa hodi hetan justisa ne’ebé lolos.
Berita terkait : PNTL Viqueque Vila detein suspeitu 12 deskonfia envolve konfrontu Bikarin
“Kontribui ba pás no establidade dalan uniku maka dadaun ne’e ita reativa fila fali ona organizasaun arte marsiál sira hodi bele kontrola organizasaun ba prevensaun konflitu nune’e bele kontribui ba pás no establidade”, nia hato’o.
Konfrontu iha Bikarin, postu adiministrativu Viqueque akontese iha segunda (10/10), ne’ebé rezulta uma sia no motorizada rua hetan estragus.
Nune’e suspeitu ba konfrontu Bikarin Polísia Nasionál Timor Leste (PNTL) eskuadra Viqueque Vila kaptura ona suspeitu hamutulk na’in 12 hodi submete ba Ministériu Públiku (MP).
Jornalista: Vitorino Lopes da Costa
Editóra : Armandina Moniz
