iklan

DILI, HEADLINE, POLÍTIKA

PR Horta: vizita Estadu hametin parseria Timor-Leste ho Kamboja

PR Horta: vizita Estadu hametin parseria Timor-Leste ho Kamboja

Prezidente Repúblika, José Ramos Horta. Imajen Tatoli/Egas Crsitóvão.

DILI, 18 outubru 2022 (TATOLI)—Prezidente Repúblika (PR), José Ramos Horta, tersa ne’e, dezloka hodi hala’o vizita Estadu ba Reinu Kamboja nu’udar konvidadu Nai Liurai-Majestade Preah Bat Samdech Preah Boromneath Norodom Sihamoni.

Notisia Relevante: Kambodia apoia Timor-Leste sai membru ASEAN iha 2023

Tuir ajenda iha tuku 10h35 dadeer ne’e, Prezidente Repúblika, Jos’e Ramos Horta, ho delegasaun dezloka ba Kamboja, liuhosi Aeroportu Internasionál Prezidente Nicolau Lobato, Komoro.

Xefe Estadu ne’e sei hala’o vizita Estadu hosi loron 19 to’o 21 fulan-outubru tinan ne’e iha Kamboja.

“Vizita ne’ebé atu hala’o daudaun ne’e sei sai nu’udar oportunidade di’ak hodi reforsa-hametin liután parseria no amizade entre nasaun rua ne’e. Vizita ne’e explora forma atu aumenta tan kooperasaun iha matéria ba dezenvolve ekonomia, seguransa ai-han, konetividade aviasaun, troka kona-ba komérsiu nian, partilla experiénsia iha setór mina-rai no mós kona-ba inisitativa rejionál sira entre matéria sira seluk tán,” refere komunikadu imprensa ne’ebé Agéncia TATOLI asesu hosi mídia PR, tersa ne’e.

Vizita Estadu ba Reinu Kamboja ne’e Prezidente Repúblika, José Ramos Horta, nu’udar vizita daruak nian ba nasaun refere tanba vizita ba dahuluk ne’e PR hala’o iha tinan 2011, iha mandatu prezidensiál tinan 2007-2012.

Hosi ne’ebá kedas mak realiza ona interkambiu vizita altu nivel lubun ida no beibeik entre nasaun rua ne’e, inklui mós vizita ifisiál eis Primeiru-Ministru (PM), Xanana Gusmão, momentu ne’ebá bainhira asume kna’ar hanesan PM iha 2013.

Iha 2016, vizita ofisiál Samdech Akka Moha Sena PadeiTecho Hun Sen, Primeiru-Ministru do Reinu Kamboja mai Timor-Leste.

Hafoin iha 2019, hatutan mós ho vizita trabalhu ba Kamboja, tantu hosi Prezidente Repúblika, Ramos Horta, nune’e mós hosi eis PR no PM, Xanana Gusmão, no Prezidente Repúblika hasoru malu ho PM, Hun Sen iha okaziaun asembleia AGNU nian ba dala 77 iha fulan-setembru tinan 2022.

“Kamboja no Timor-Leste iha no hala’o relasaun ne’ebe di’ak tebes. Núdar atuál Prezidebte ASEAN nian, Kamboja daudaun ne’e sai mós nu’udar defensór forte tebes kona-ba adezaun Timor-Leste atu adere tama ba membru ASEAN,” nota ne’e haktuir.

Durante Vizita Estadu ida ne’e mós Prezidente Repúblika, José Ramos Horta, sei hala’o reuniaun ho Majestade Liurai, Primeiru Ministru, Hun Sen, no kortezia ba Prezidente Senadu ba hosi Prezidente Assembleia Nasionál Reinu Kamboja nian.

Xefe Estadu nia pontu kulminante mak sei ba ko’alia iha universidade tolu, tuir mai iha ne’eba sei simu kondekorasaun iha “Doutoramento Honoris Causa iha  Administrasaun no Lideransa Edukativa” no ida fali iha “Professor Honorário Distinto de Relações Internacionais”.

Iha Vizita Estadu ida-ne’e mós sei akompaña hosi setór privadu Timor-Leste nian no komunidade emprezariál, no sira iha ne’eba sei partisipa iha fórum emprezarial ida-ne’ebé mak organiza hosi Ministéiru Negósiu Estanjeiru no Kooperasaun (MNEK) no embaixada Timor-Leste iha Reinu Kamboja, ein parseria serbisu hamutuk ho Kámara Komérsiu Kamboja nian ho Trade Invest Timor-Leste.

Prezidente Repúblika sei fila-fali mai Timor-Leste iha loron 23 fulan outubru ne’e.

Notisia Relevante: PN aprova pedidu PR Horta vizita Kamboja-Suisa-Portugál

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!