UNICEF husu Governu aselera ezbosu lei lista atividade perigozu ba labarik
DILI, 18 outubru 2022 (TATOLI)—Reprezentante UNICEF iha Timor Leste, Bilal Durrani, hateten traballu infantil hanesan kestaun sériu iha Timor-Leste, nune’e Governu presiza aselera no aprova ezbosu lei lista atividade perigozu ba labarik hodi bele prevene atividade labarik iha dalan públiku.
Notísia Relevante: CNCTI submete esbosu lei ba Governu relasiona atividade perigozu labarik
“UNICEF husu ba Governu atu aprova no implementa Planu Asaun Nasionál (PAN) kona-ba protesaun labarik hosi traballu infantil iha Timor-Leste. Ida-ne’e mak asaun konkretu ne’ebé mak Governu presiza hala’o, entaun presiza Governu aselera no aprova hodi implementa maibé bainhira atu implementa Governu tenke prepara mós rekursu umanu hosi munistériu relevante sira,” Bilal Durani hateten hafoin UNICEF selebra loron mundiál ai-han tinan 2022 ho tema “Labele husik hela ema ida iha kotuk atu harii mundu ida di’akliu”, iha Sentru Konvensaun Dili (CCD, sigla portugés), tersa ne’e.
Tanba tinan barak ona ezbosu lei ne’e, Governu seidauk aprova to’o agora tanba ne’e Governu presiza aselera no aprova hodi implementa, atu bele asegura labarik no fó protesaun ba labarik sira.
“Ida-ne’e importante ba UNICEF atu hatene kauza loloos hosi traballu infantil mak saida. Tanba ne’e mak ita servisu hamutuk ho International Labour Organization (ILO) halo peskiza kuantidade ida ba traballu infantil ne’e,” nia dehan.
Asuntu ne’e mós servisu hamutuk ho Prezidente Institutu Defeza Direitu Kriansa (INDDICA, sigla porugés) no Komisaun Nasionál Kontra Traballu Infantil (CNCTI, sigla portugés) hodi dezenvolve no finaliza planu asaun nasionál iha hela ministériu ekonómia esforsu hodi aselera, atu nune’e bele prevene traballu infantil iha Timor-Leste.
Tuir dadus ne’ebé mak hatudu katak labarik 48% mak halo servisu hanesan traballu infantil.
UNICEF servisu iha área importante lima (5) ne’ebé mak iha nia implikasuan no iha impaktu ba labarik nia moris hanesan saúde maternál, saúde ba bebé ne’ebé mak moris, seluk labarik asesu ba edukasaun no mós bee-moos, saneamentu no ijiéne inklui labarik la eskola no abandona eskola.
Notísia Relevante: CNCCTI-IG relata rekomendasaun neen traballu infantil ba MKAE
Jornalista : Osória Marques
Editór : Cancio Ximenes
